ئوندەر كە ئەندامی شاندی ئیمراڵی بو، بۆ چارەسەری پرسی كورد لەباكوری كوردستان لە تەمەنی (63) ساڵی كۆچی دواییكرد.


هەواڵ: (KNNC)


دوای مانەوەی (18) رۆژ لە نەخۆشخانە و بەهۆی توشبونی بەجەڵتەی دڵ، سری سورەیا ئۆندەر كە لە (7ـی تەمموزی 1962) لە دایك بوە، جێگری سەرۆكی پەرلەمانی توركیا و پەرلەمانتاری پارتی یەكسانی و دیموكراسی گەلان (دەمپارتی) لە بازنەی ئیستانبوڵ، لەتەمەنی (63) ساڵیدا كۆچی دواییكرد.


کەسایەتی سیاسیی، دەرھێنەری فیلم، ئەکتەر و ستونوسە، سەرباری ئەوەی كە ئوندەر بەڕەگەز تورك بوە، بەڵام بەدۆستێكی دێرینی كورد ناسراوە و لە لاوێتییەوە خەباتی بۆ مافەكانی كورد كردوە، لەسەر هەڵوێستەكانی چەندین جار روبەڕوی بەندكردن بوەتەوە.

لە پرۆسەی ئاشتی باكوری كوردستاندا ئەندامی شاندنی (دەمپارتی) بۆ ئیمراڵیی بوە و دو جار سەردانی عەبدوڵا ئۆجەلان، رێبەری زیندانیكراوی پەكەكەی كردوە و پەیامی ئۆجەلانیان هێنایەوە و لە رێوڕەسمێكدا پەیامەكەیان راگەیاندوە.

لە رۆژی (15ـی نیسانی 2025) لەماڵەی خۆیدا توشی جەڵتەی دڵ بوە و پاش (18) رۆژ مانەوە لە نەخۆشخانەی فلۆرانس نایتینگلی ئیستانبوڵ، ئەمڕۆ شەممە (3ـی 5ـی 2025) لە كاتژمێر (04:10) خولەك لە نەخۆشخانە و لە تەمەنی (63) ساڵیدا كۆچی دواییكرد.