خواجە عاسف، وەزیری بەرگری پاکستان لە چاوپێکەوتنێکدا لەگەڵ سکای نیوز، ئەوەی پشتڕاستکردوەتەوە وڵاتەکەی پشتیوانی لەو گروپە تیرۆرستییانە  دەکات کە  لە وڵاتانی ناوچەکەدا چالاکی دەکەن و لە ئێستاشدا پەشیمانن لەو کارەیان و خۆیان پێوەی دەناڵێنن.

هەواڵ:KNNC

وەزیری بەرگری پاکستان ئەم قسانەی لە وەڵامی پرسیارێکی  سکای نیوز کردوە،  کە لێیان پرسیوە، ئایا لەگەڵ ئەوەدایت کە پاکستان مێژویەکی دور و درێژی لە  پشتیوانیکردن و ڕاهێنان و پارەدارکردنی گروپە تیرۆریستییەکاندا هەیە؟

ناوبراو لە وەڵامدا وتویەتی؛ بەڵێ راستە و  ئێمە بۆ ماوەی سێ دەیە ئەم کارە پیسەمان بۆ ئەمەریکا و بۆ ڕۆژئاوا کردوە، بەتایبەتی لەنێویاندا بەریتانیا،  ئەو وەزیرە دانیبەوەشداناوە کە ئەو کارەیان هەڵە بوە و ئەوەتا ئێستا بەدەست دەرئەنجامەکانیەوە دەناڵێنین.

لە رابردودا و بەردەوام حکومەتە جۆربەجۆرەکانی پاکستان لە ماوەی سێ دەیەی ڕابردودا بە پاڵپشتیکردنی گروپە تیرۆریستی و توندڕەوەکان تۆمەتبار کراون، لەوانەش داڵدەدان و پڕچەککردنی تاڵیبان.

بەردەوامیش کاربەدەستانی پاکستان ئەم تۆمەتانەیان ڕەتکردۆتەوە و ئێستا خواجە عاسف یەکەم بەرپرسە لە حکومەتەکەی ئێستای پاکستاندا راستەوخۆ و  بە ئاشکرا دانبەوەدا دەنێت  وڵاتەکەی ڕۆڵی هەبوە لە پاڵپشتیکردن، بەهێزکردن،  پشتیوانیکردن و ڕاهێنانی کردن بە گروپە تیرۆریستییەکان.