گەڕی دوەمی سەردانەکانی دەمپارتی بۆلای پارت و لایەنە سیاسییەکان دەستی پێکردوەتەوە و ئەمڕۆش لە چوارچێوەی سەردانەکاندا، لەگەڵ سێ پارت و لایەن کۆدەبنەوە.

هەواڵ:KNNC

پارتی یەکسانی و دیموکراسی گەلان-(دەمپارتی) لە چوارچێوەی تاوتوێکردنی بانگەوازەکەی عەبدوڵا ئۆجەلان، ڕێبەری (پەکەکە) و چارەسەرکردنی پرسی کورد لە تورکیا، لەگەڵ سێ پارت و لایەنی سیاسی کۆدەبێتەوە.

بە گوێرەی کارنامەی سەردان و کۆبونەوەکانی دەمپارتی، ئەمڕۆ شاندی دەمپارتی بە سەرۆکایەتی هەریەك لە هاوسەرۆکان، تونجەباکرهان و تولای هاتیم ئوغڵاری، لە پەرلەمانی تورکیا لەگەڵ پارتی کرێکارانی تورکیا کۆدەبنەوە. پاشانیش سەردانی بارەگای سەرەکی هەریەك لە پارتەکانی ئایندە و سەعادەت دەکەن.

هاوکات، بڕیاریشە، شاندی دەمپارتی، ڕۆژی یەكشەممەی هەفتەی ئایندە لە پەرلەمانی تورکیا، لەگەڵ پارتی نەتەوە پەرستی تورکیا-(مەهەپە) و پارتی داد و گەشەپێدانی-(ئاكپارتی) کۆببنەوە.