بەپێی خەمڵاندنە سەرەتاییەكان، بەهۆی جەنگی نێوان حزبوڵا و سوپای ئیسرائیل، لوبنان نزیكەی (20) ملیار دۆلار زیانی بەركەوتوە.

هەواڵ: (KNNC)


ئەمین سەلام، وەزیری بازرگانی و ئابوری حكومەتی لوبنان رایگەیاندوە: لەئەنجامی جەنگی نێوان حزبوڵای لوبنانی و هێرش و پەلامارەكانی سوپای ئیسرائیل بۆسەر ئەو وڵاتە، لوبنان زیانێكی گەورەی بەركەوتوە كە بەپێی خەمڵاندنە سەرەتاییەكان لەنێوان (15 بۆ 20) ملیار دۆلاردایە.


وتیشی: پێش فراوانبونی هێرشەكانی ئیسرائیل، خەمڵاندنی زیانەكان نزیك دەبونەوە لە (10) ملیار دۆلار، كە زۆربەی زیانەكانیش بەر کەرتە بنەڕەتییەکان بەتایبەتی گەشتیاری و کشتوکاڵ كەوتبون، بەڵام لەدوای چڕكردنەوەی هێرشەكە و پەككەوتنی چالاكی ئابوری، دوای ئاگر بەست و روپێوی كردنی مەیدانی گوند و شارە و ناوچەكانی دیكە دەكرێت و بەدڵنیایییەوە ئەو ژمارانە دەگۆڕێن.


وەزیری بازرگانی و ئابوری حكومەتی لوبنان ئاشکرایکرد، لە ئەنجامی ئاوارەبونی نزیکەی ملیۆنێک و (500) هەزار هاوڵاتی، زیاتر لە (500) هەزار كەس كارەكانیان لەدەستدا ئەوەش زیانی گەورەی لە ژێرخانی و دامەزراوە بازرگانییەکان تارادەی  لەناوچون و ئیفلیجی تەواوەتی لە کەرتی گەشتیاری داوە.


لە (8ـی تشرینی یەكەمی 2023)ـوە جەنگی نێوان حزبوڵای لوبنان و ئیسرائیل دەستی پێكرد، بەهۆیەوە سێ هەزار و (961) گیان لەدەستدان و برینداربونی (16) هەزار و (520) كەسی لێكەوتەوە كە ژمارەیەكی زۆری قوربانیان ژن و منداڵن، هەروەها زیاتر لە یەك ملیۆن (400) هەزار كەس ئاوارەبون.


لە رۆژی سێشەممە (2024/11/26) ئاگر بەستی لەنێوان حزبوڵا و سوپای ئیسرائیل راگەیەندرا و لە بەرەبەیانی رۆی چوارشەممە چوە بواری جێبەجێ كردنەوە.