رۆژنامەیەکی فەڕەنسی باس لەوە دەکات لەلایەن سیخوڕێکی ئێرانییەوە زانیاریی ورد لەسەر حەسەن نەسڕوڵڵا دراوەتە ئیسرائیل میدیاکانی ئیسرائیلش هاوکاریی خەڵکانی ناوچەکە بە هۆکاری سەرکوەتنی ئۆپەراسیۆنەکەی ئیسرائیل ناو دەبەن.

هەواڵ:KNNC

رۆژنامەی لو پاریزیا -ی فەرەنسی بابەتێکی لەسەر کوژرانی حەسەن نەسڕوڵڵای ئەمینداری گشتیی حزبوڵڵا، بڵاوکردوەتەوە و دەڵێت: "سیخوڕێکی ئێرانی زانیاریی وردی لەسەر جموجوڵەکانی حەسەن نەسروڵڵا هەبوە و پێش گەیشتنی بۆ شوێنی کۆبونەوەکە لە باشوری بەیروت، ئیسڕائیلی ئاگادارکردوەتەوە لەوەی لەگەڵ عەباس نیلفرۆشانی فەرماندەی ئۆپەراسیۆنەکانی سوپای پاسداران پێکەوە لە ئۆتۆمبێلێکدان".

ڕۆژنامەکە ئاماژەی بەوەشداوە، ئیسرائیل چاوەڕوانی دەستپێکردنی کۆبونەوەکەی کردوە و هێرشی کردوە، دواتریش حەسەن نەسروڵا و بەرپرسەکەی پاسداران و 12 سەرکردەی دیکەی حزبوڵا کوژران.

هاوکات،  رۆژنامەی یەدیعۆت ئەحرەنۆتی ئیسڕائیلیش ئاماژەی بەوەداوە، سوپای ئیسرائیل بەهاوکاری و زانیاری خەڵکی دەوروبەری ئەو باڵەخانەیەی بە ئامانجیان گرتبو، توانیویانە سەرکوتوبن لە کوشتنی حەسەن نەسروڵا.

نیو یۆرک تایمزی ئەمەریکیش بڵاویکردوەتەوە، بڕیاری کوشتنی حەسەن نەسروڵا و جێبەجێکردنی لە هەمان ڕۆژدا دراوە، چونکە سەرکردەکانی ئیسڕائیل پێیان وابوە، دەرفەرتێکی کەمیان لەبەردەستدایە.