ئەمڕۆ لە عێراق یەکەم زەنگی ساڵی نوێی خوێندن لێدرا، وتەبێژی وەزارەتی پەروەردەی عێراق رایگەیاند، بەراورد بە ساڵی رابردو ئەمساڵ 100هەزار قوتابی قۆناغی یەکەمی سەرەتایی زیادی کردوە.

 

هەواڵ:KNNC

 

بەپێی رۆژژمێری خوێندنی وەزارەتی پەروەردەی عێراق و لە هەریەک کەرکوک و خانەقین و شنگال، یەکەمین رۆژی ساڵی نوێی خوێندنە، کە خوێندن بە زمانەکانی کوردی و عەرەبی تورکمانی دەستپێدەکات.

 

بەپێی ئامارەکانیش نزیکەی 133 هەزار خوێندکار لە هەزار و 212 خوێندنگەی هەریەک لە کەرکوک و خانەقین و شنگال دەخوێنن و زیاتر لە 15 هەزار مامۆستا و وانەبێژ و فەرمانبەری بەشی کوردیش هەیە.

 

هاوکات و هەر ئەمڕۆ یەکەم زەنگی ساڵی نوێی خوێندن لە عێراق دەستیپێکرد و دەرگای 30 هەزار ناوەندی خوێندن بە روی زیاتر لە 12 ملیۆن خوێندکاری عێراقیدا کرایەوە. 

 

 

کەریم سەید، وتەبێژی وەزارەتی پەروەردەی عێراق رایگەیاند، ژمارەی دانیشتوانی عێراق لە زیادبوندایە و ساڵی رابردو ملیۆنێک و 100 هەزار خوێندکار پۆلی یەکی سەرەتایی چونەتە خوێندن و بەراورد بە ساڵی رابردو، ئەمساڵ 100 هەزار قوتابی قۆناغی یەکەمی سەرەتایی زیادی کردوە.

 

مامۆستایان رۆژی 15ی ئەیلول پەیوەندییان بە ناوەندەکانی خوێندن لە سەرتاسەری عێراقدا کردەوە و دوای هەفتەیەک پڕۆسەی خوێندن لە سەرتاسەری وڵاتەکە دەستی پێکرد.

134 جار خوێندراوەتەوە