بەڕێوەبەری سایلۆکانی سلێمانی رایدەگەیەنێت؛ زۆربەی گەنمی جوتیاران لە سنوری پارێزگای سلێمانی وەرگیراوە و  لەو پارەیەشی بۆ گەنمی جوتیاران تەرخان کراوە، بەشێکی گەیشتوە.

هەواڵ:KNNC

نەسرین ئەحمەد عەلی، بەڕێوەبەری سایلۆکانی سلێمانی لە (کەی ئێن ئێن)ی راگەیاند؛ لە رۆژی (6/6/2024)ەوە دەستکراوە بە پڕۆسەی وەرگرتنی گەنم لە جوتیاران و لە کۆی (282) هەزار و (608) تۆن گەنم کە بۆ سلێمانی دیاریکرابو، توانراوە (277) هەزار و (499) تۆن گەنم لە جوتیاران وەربگیرێت، بەوەش زۆرینەی ئەو گەنمە وەرگیراوە کە وەکو پشتی جوتیارانی سنوری سلێمانی دیاریکرابو.

رونیشیکردەوە، کە نزیکەی سێ هەزار تۆن گەنم بەپێی پێوەرەکان و رێنماییەکان رەتکراونەتەوە و ئەوەشی دەمێنێتەوە جوتیارەکان سەردانیان نەکردبو بۆ رادەستکردنی گەنم.

سەبارەت بە پشکی گەنمی جوتیاران، بەڕێوەبەری سایلۆکانی سلێمانی ئاماژەی بەوەکرد، لە کۆی 198 ملیار دینار کە وەکو شایستەی دارایی جوتیارانی سلێمانی دیاریکراوە، 31 ملیار دینار گەیشتوەتە دەستیان و سەرجەمیان بەسەر جوتیاراندا دابەشکردوە.