سەرۆکی دەستەی وەبەرھێنان ئاشکرای دەکات، لە ئێستادا ھەنگاوەکانی کرداری بۆ دروستکردنی 20 ھەزار یەکەی نیشتەجێبون لە ھەرێمی کوردستان بۆ خەڵکی ھەژار و کەمدەرامەت دەستپێدەکات.

د. محەمەد شوکری، سەرۆکی دەستەی وەبەرھێنان راگەیاند: وەکو دەستەی وەبەرھێنان دەزگای کان و کۆمپانیای تیپسای ھاوبەشی راسپاردوە کە لە ڕوی راوێژکاری و ئەندازیاریەوە ھاوکاری ئێمە بکەن بۆ دروستکردنی 20 ھەزار یەکەی نیشتەجێبون لە ھەرێمی کوردستان، کە ئێمە ئامادەین ھەمو ھاوکاریەکیان بکەین.

سەرۆکی دەستەی وەبەرهێنان لە لێدوانێکدا بۆ میدیای فەرمی پارتی وتویەتی: “ئامانجی حکومەت ئەوەیە کە پڕۆژەیەکی نمونەیی بێت لە ڕوی کوالێتی و دابینکردنی خزمەتگوزاری، بۆیە پێویستە لە ئاست داخوازی دانیشتوانی پڕۆژەکە بێت".

ناوبراو ده‌شڵێت: “ھەنگاوی کرداری بۆ دروستکردنی 20 ھەزار یەکەی نیشتەجێبون دەستی پێکردوە، بۆ ئەوەی پڕۆژەکە بکەوێتە بواری جێبەجێکردنەوە، کە تا ئێستا زیاتر لە 100 ھەزار کەس فۆرمەکەی پڕکردۆتەوە".