بەغداد یەکەم هەنگاوی نا بۆ چارەسەری خۆڵبارین و پیسبونی ژینگە

KNN : Kurdish News Network
12:17 - 05/06/2022
عێراق

دەستەی ئەمینداریەتی بەغدادی پایتەخت کەمپینێکی راگەیاندوە بە مەبەستی گۆڕینی ژینگەی عێراق و سەوزکردنی شارەکە لە رێگەی چاندنی (10) هەزار نەمامەوە.

 

ئەمڕۆ یەکشەممە، دەستەی ئەمینداریەتی بەغدادی پایتەخت راگەیەنراوێکی بڵاوکردەوە و تێیدا هاتوە، دەستدەکەن بە سەوزکردنی شارەکە و دەیانەوێت ئەو شوێنانەی سەوزاییان کەمە پشتوێنێکی سەوزایی بۆ دروست بکەن. 

 

ئاماژەی بەوەشداوە، داوایان لە بەرێوەبەرایەتییەکانی شارەوانی کردوە روبەری زیاتر بۆ دروست کردنی باخچە و سەوزایی تەرخان بکات.

 

دەشڵێت: ئەو کەمپینە بەردەوام دەبێت بۆ سەوزکردنی پارکەکان و دەشتاییەکان بۆ ریگریکردن le دیاردەی بە بیابان بون.

 

ئەوەش لەکاتێکدایە، هەفتەی رابردو پارکێك لە بەغداد کرایەوە کە روبەرەکەی چوار دۆنمە بۆ ئەوەی هەوای شارەکە پاکتر بێت و رێگر بێت لە خۆڵبارین و کەمکردنەوەی پیسبونی ژینگە.

1163 جار خوێندراوەتەوە