سەرۆکى هەرێمى کوردستان رایدەگەیەنێت؛ پێویستە عێراق بەپێى دەستور مامەڵە لەگەڵ پێشمەرگە بکات، دەشڵێت: دەبێت پارتى و یەکێتى دەستى حیزب لەسەر پێشمەرگە هەڵگرن.

لەکاتى پێشکەشکردنى وتارێک لە رێورەسمی دەرچوونی خولی 16ی ئەفسەران لە کۆلێژی سەربازیی قەڵاچوالان نێچیرڤان بارزانى سەرۆکى هەرێم رایگەیاند: داوا دەکەین بەپێى دەق و روحى ناو دەستور لەگەڵ بەغداد مامەڵە لەگەڵ یەکترى بکەین کە ئەوەش دەبێتە هۆى بەهێزبونى عێراقى فیدڕاڵ و ئەو بەهێزیەش بۆ هەمو لایەکە، وەک چۆن شکستەکانمان هاوبەشن.

نێچیرڤان بارزانى وتیشى،" داوا لە فەرماندەى گشتى هێزە چەکدارەکانى عێراق و وەزیرى بەرگرى و سەرۆکى ئەرکانى سوپاى عێراق دەکەم وەک لە دەستورى عێراقدا هاتوە، وەک بەشێک لە سیستمى بەرگرى عێراق تەماشاى هێزى پێشمەرگە بکەن و پێداویستییەکانى بۆ دابین بکەن."

باسى لەوەشکرد، پێویستە پەلە بکرێت لە دروستکردنى هەردو لیواى هاوبەش، کە ئەوەش دەبێتە هۆى دروستکردنى هەماهەنگى زیاتر و رێگریکردن لە بەهێزبونەوەى داعش.

هەروەک ئاماژەى بەوەشکرد، ئەو ئۆپەراسیۆنە هاوبەشانەى ئەم دواییانەى نێوان پێشمەرگە و سوپاى عێراق کارێکى سەرکەوتوانە بو ئەوەش پێویستى بە بەردەوامى هەیە.

لەبارەى چاکسازییەکان و یەکخستنەوەى هێزى پێشمەرگە، سەرۆکى هەرێم وتى،" تائێستا هەردو هێزى پشتیوانى یەک و دو و 22 لیواى هێزەکانى 70 و هەشتا خراونەتە سەر هێزى پێشمەرگە، بەڵام یەکخستن و رێکخستنەوەى پێشمەرگە پێویستى بەکارى خێرا هەیە و پێویستە پەلەى لێبکرێت و دەبێت یەکبخرێتەوە".

جەختى لەوەشکردووە، دەبێت پارتى و یەکێتى بە باوەڕ و بێ پەشمانى بڕیار بدەن کە دەستى حیزب لەسەر پێشمەرگە هەڵبگرن و کۆتایى بە دەستێوەردانى حیزبى لەناو هێزى پیشمەرگە بهێنن، بەو شێوەیە یەکخستن و رێکخسیتنى هێزى پێشمەرگە سەرکەوتو دەبێت بەپێچەوانەوە لەگەڵ دروستبونى هەر ناکۆکییەک ئەوەى جێبەجێشکراوە هەڵدەوەشێتەوە.