لە هەولێر تاپۆکردنى ئەو زەویانەى کارتن راگەیەنرا، یەکەیەکی تایبەتیش کراوەتەوە بۆ تاپۆکردنیان.

لە سنوری شارەوانیی قەزا و ناحیەکانی پارێزگای ھەولێر، ساڵانی ڕابردوو ژمارەیەکی بەرچاوی زەوی دابەش کراون و ھێشتا کارتن و نەکراونەتە سەنەد، بەڕێوەبەری گشتیی شارەوانییەکانیش دەڵێت، پڕۆسەی تاپۆکردنیان دەست پێ کردووە و یەکەیەکی تایبەت کراوەتەوە بۆ تاپۆکردنیان.

سەرتیپ خالید، بەڕێوەبەری گشتیی شارەوانییەکانی ھەولێر، راگەیاند: ''یەکەیەکی تایبەت ھەیە بۆ تاپۆکردنی ئەو زەوییانەی پێشتر دابەش کراون و ئەرکی ئەو یەکەیە تایبەت بە گۆڕینی کارت بۆ سەنەد و پڕۆسەی تاپۆکردنی زەوییە کارتەکان لەلایەن وەزیری شارەوانی و گەشتوگوزارەوە سەرپەرشتی دەکرێت، پڕۆسەکە دەمێکە دەستیپێکردووە و ھەندێکیان گەیشتوونەتە قۆناغی کۆتایی.''

لەو لێدوانەیدا، سەرتیپ خالید بۆ ماڵپەڕى پارتى ئاماژەی بەوەکردووە: "ژمارەیەک کارت گۆڕدراون بۆ سەنەد و بەسەر خاوەنەکانیاندا دابەش کراون و حکومەت بەردەوام دەبێت لە پرۆسەی تاپۆکردنی زەویی کارت لە ھەموو سنوری بەڕێوەبەرایەتیی گشتیی شارەوانییەکانی ھەولێر، واتە لە سنوری ھەر شارەوانییەک زەویی کارت ھەبێت کاری لەسەر دەکرێت بکرێتە سەنەد.''