بەفەرمیی زمانى کوردى بۆ وەرگێڕى گوگڵ زیاد کرا

KNN : Kurdish News Network
10:18 - 13/05/2022
کوردستان

دواى ئەوەى کۆمپانیای گوگڵ لە کۆنگرەی ساڵانەی خۆى 24 زمانی بە فەرمی بۆ بەشی وەرگێڕانی وێب سایتەکە زیاد کرد کە لە نێوانیادا کوردی سۆرانی هەبو، ئەمڕۆ زمانى کوردى بە فەرمیی لە وەرگێڕى گوگڵ (گوگڵ ترانسلەیت) زیاد کرا.

پڕۆژەى زیادکردنى زمانى کوردى لە گوگڵ لەلایەن گەنجێکى هەڵەبجەییەوە بۆ ماوەى حەوت ساڵە کارى داتاکردن و تێستکردنى بۆ دەکرێت و دواجار ئەمڕۆ لە وەرگێڕى گوگڵ زمانى کوردى زیادکرا و بەکارهێنەران دەتوانن زمانى کوردى وەرگێڕنە سەر زۆرینەى زمانە جیهانییەکان.

پێشتر بۆکان حەسەن خاوەنی پرۆژەی زیادکردنی زمانی کوردى بۆ وەرگێڕانی گوگڵ لە لێدوانێکیدا بۆ کەى ئێن ئێن باسى لەم هەنگاوە کرد و وتى: ئەمە وەرچەرخانێکى گەورەیە لە زمانى کوردیدا و ئەم هەنگاوەش رێگا بۆ شێوەزارەکانى دیکەیش دەکاتەوە کە لە داهاتودا بخرێنە بەرنامەى گوگڵ ترانسلەیتەوە.

 ئێستا بەکارهێنەران دەتوانن لەرێى دۆزینەوەى (کوردیش سۆرانیی)ەوە لە هەڵبژاردەى زمانەکانى ناو وەرگێڕى گوگڵ زمانى کوردى بۆسەر 133 زمانى جیهان وەربگڕێن.

1089 جار خوێندراوەتەوە