لە راپۆرتى ساڵانەیدا، وەزارەتى دەرەوەى ئەمەریکا چۆن باس لە پارتى و یەکێتى دەکات

KNN : Kurdish News Network
03:27 - 13/04/2022
ڕاپۆرت

وەزارەتى دەرەوەى ئەمەریکا راپۆرتى تایبەتى ساڵى 2021ـى لەبارەى مافەکانى مرۆڤ لە وڵاتانى جیهان بڵاوکردەوە و بەپێى ئەو راپۆرتە و ئەوەى تایبەتە بە عێراق و هەرێمى کوردستان باس لە چەندین لایەن کراوە کە دۆخى خراپى ئازادییەکان و بەڕێوەبردنى وڵات و ئازادییەکانى تێدا باسکراوە.


 لەسەرەتاى راپۆرتەکەدا وەزارەتى دەرەوەى ئەمەریکا، باس لە پرسى هەڵبژاردنەکانى عێراق کراوە و ئاماژە بە گۆڕینى رێڕەوى شەفافیەتى هەڵبژاردنەکان دەکات لە عێراق و دەڵێت: دواى ئەوەى خۆپیشاندانەکانى 2019 بونە هەوێنێک بۆ ئەنجامدانى هەڵبژاردن و هەڵبژاردنەکەیش بە ئازادى و دادپەروەرانە و لەژێر چاودێرى نێودەوڵەتیدا بەڕێوەچو، بەڵام گروپە میلیشیا سەربازییەکان لە پێش هەڵبژاردنەکانەوە دەستیان  بە بڵاوکردنەوەى ترس و تۆقاندنەکان کردوە کە ئەمەش دەکرێت کاریگەرى لەسەر ئەنجامى هەڵبژاردنەکان هەبوبێت.


لەبارەى خۆپیشاندانەکانى ئۆکتۆبەرى (2020)یش، راپۆرتەکە ئاماژەى بۆ ئەنجامدانى ژمارەیەکى زۆر توندوتیژى بەرامبەر خۆپیشاندەران کردووە و ئاشکراى کردووە، تائێستا 54 خۆپیشاندەر بێسەروشوێنن و هەوڵیش بۆ کوشتنى 86 چالاکوان دراوە و 35 چالاکوانیش کوژراون .


لە راپۆرتەکەى وەزارەتى دەرەوەى ئەمەریکادا باس لە دۆخى هەرێمى کوردستان و ئازادییەکان کراوە، تێیدا ئەوە خراوەتەڕو کە  لەلایەن رێکخراوەکانى مافى مرۆڤەوە چەندین راپۆرت دژى دەسەڵاتدارانى هەرێم دراوە تایبەت بە خراپى دۆخى ئازادییەکان  و ئازادى رادەربڕین و باسیش لە دۆخى زیندانیانى بادینان کراوە و وەزارەتى دەرەوەى ئەمەریکا دەڵێت: دەسەڵاتدارانى هەرێم رۆژنامەنوسان و چالاکوانانیان دەستگیرکردوە و بۆ ماوەیەکى درێژیش بێ ئەوەى دادگایی بکرێن یاخود هیچ تۆمەتێکیان هەبێت بۆماوەیەکى درێژ دەستگیرکراون.

 ئاشکراشکراوە کە لەلایەن ئاسایش و هێزەکانى پێشمەرگەوە چەندین کەس بێ تۆمەت و سەپاندنى هیچ تاوانێک دەستگیرکراون و بێ دادگاییکردن راگیراون.



لەبارەى هێزە ئەمنییەکانى هەرێمى کوردستانیشەوە لە راپۆرتەکەدا تیشکخراوەتە سەر ئەوەى کە پارتى و یەکێتى بە جیا دەزگا ئەمنییەکانیان بەڕێوەدەبەن و هێزەکانى پێشمەرگەیان جیا کردوەتەوە و هەرێمى کوردستان خاوەنى هێزێکى نیشتیمانى نییە و بە جیا لەلایەن ئەو دو حیزبەوە بەڕێوەدەبرێت.

هەر لەبارەى خراپ بەڕێوەبردنى هێزە ئەمنییەکان و ئاسایشەوە لە عێراق و هەرێمى کوردستان وەزارەتى دەرەوەى ئەمریکا دەڵێت کە چەندین راپۆرتى رێکخراوەکانى کۆمەڵگەى مەدەنى ئاماژەیان بەوە کردوە کە بەهۆى خراپ بەڕێوەبردنى هێزە ئەمنییەکانەوە هێزەکانى پۆلیسى فیدراڵى و حەشدى شەعبى و ئاسایشى هەرێم ئەشکەنجەى سزادراوان دەدەن و بەشێوەیەکى نامرۆڤانە مامەڵەیان لەگەڵ دەکەن.


792 جار خوێندراوەتەوە