وەزارەتی ناوخۆی کازاخستان ئاشکرایکرد، ژمارەی ئەو کەسانەی تا ئەمڕۆ لەلایەن پۆلیسەوە دەستگیرکراون، گەیشتووەتە حەوت هەزار و (939) کەس.

بەپێى راگەیەنراوێکى وەزارەتى ناوخۆى کازاخستان، هەڵمەتى دەستگیرکردنى روداوەنى کازاخستان درێژەى هەیە و تا ئەمڕۆ، حەوت هەزار و (939) کەس لەلایەن پۆلیسەوە دەستگیرکراون.

لە راگەیەندراوەکەدا باسلەوە کراوە، لە دوو بازاڕی شاری ئالماتی-دا، (207) کەس دەستگیرکراون و دەستبەسەر پێنج ئۆتۆمبێلی دزراو، و ژمارەیەک کۆمپیوتەر و ئامێری موزیک و شتی دزراوی دیکەدا گیراوە.

لە لایەکی دیکەوە، لیژنەی ئەمنیی نەتەوەیی کازاخستان، ئاماژەی بەوە کرد کە لە رووداوەکاندا، دوو گرووپ لە چالاکی خراون کە لە رۆژانی (4 و 8)ی کانوونی دووەمدا هەوڵیانداوە بۆ تێکدانی شیرازەی گشتیی لە شارەکەدا و لەو شوێنانەی ماونەتەوە دەست بەسەر ژمارەیەک چەک و کتێبی ئایینیدا گیراوە.

چەند رۆژێکە، خۆپیشاندانى گەورە لە دژى گرانبونى نرخى سوتەمەنى کازاخستانى گرتۆتەوە، بەهۆى دروستبونى گرژى و توندوتیژییەکانیشەوە زیاتر لە هەزار کەس لە خۆپیشاندەران و هێزە ئەمنییەکان کوژراون و برینداربون، بەدەیان ئۆتۆمبێل و دامەزراوەش سوتێنراون.