لە هەولێر کەسێک ویستویەتى بچێتە ناو یەکێک لە فەرمانگەکانى حکومەت و لەلایەن پاسەوانەکانەوە کوژرا

KNN : Kurdish News Network
10:22 - 27/11/2021
کوردستان

پۆلیسى هەولێر رونکردنەوەى لەبارەى روداوەکەى ئێوارەى ئەمڕۆى ناو فەرمانگەى پەیوەندییەکانى دەرەوەى حکومەتى هەرێمەوە بڵاوکردەوە و رایگەیاند:" کەسێک ویستویەتی بچێتە ناو فەرمانگەی پەیوەندییەکانی دەرەوەی حکوومەتی هەرێم و هێرشی کردووەتە سەر پاسەوانەکان ، ئەوانیش روبەڕوی بوونەتەوە و لە ئەنجامدا گیانیلەدەست داوە.

لە رونکردنەوەیەکدا پۆلیسى هەولێر رایگەیاند: کاتژمێر (6:00)ى ئێوارەى ئەمڕۆ شەممە، کەسێک ویستویەتی بچێتە ناو فەرمانگەی پەیوەندییەکانی دەرەوەی حکوومەتی هەرێم و هێرشی کردوەتە سەر پاسەوانەکان.

دەشڵێت: پاسەوانەکان رووبەڕوی بوونەتەوە و لە ئەنجامدا گیانیلە دەستداوە.

هەرچەندە لەبارەى ناوەڕۆکى روداوەکەوە پۆلیسى هەولێر هیچ شتێکى دیکەى نەدرکاندووە، بەڵام باسى لەوەکردووە دواى روداوەکە هێزەکانیان دەستبەجێ گەیشتونەتە شوێنی روداوەکە و تەرمی کوژراوەکه‌ بە ناوی (م. م) بۆ پزیشکی دادی گواستراوەتەوە.

پۆلیسى هەولێر ئاماژەى بەوەشکردووە، لە ئێستادا لێکۆڵینەوە دەستی پێکردووە و دواتر زانیاریی زیاتر لەوبارەیەوە بڵاو دەکەنەوە.

5066 جار خوێندراوەتەوە