تەندروستى هەولێر ئامادەکارى بۆ وەرگرتنى زۆرترین ژمارەى توشبوانى کۆرۆنا دەکات

KNN : Kurdish News Network
02:39 - 21/07/2021
کوردستان

ئامادەکاریەکان بۆ بەرەنگاربونەوەی هەڵکشانی رێژەى ڤایرۆسی کۆرۆنا لە هەولێر دەستیپێکرد و پلانێک بۆ وەرگرتنی زۆرترین ژمارەی توشبوانى کۆرۆنا لە نەخۆشخانەکاندا دادەنرێت.

ئەمڕۆ چوارشەممە (21/7/2021)، بە ئامادەبونى وەزیرى تەندروستى حکومەتى هەرێم، کۆبونەوەى ژمارەیەک لە بەڕێوەبەرى نەخۆشخانەکان بۆ ئامادەکاری و خستنەبواری جێبەجێکردنی پلانەکانی وەرگرتنی زۆرترین ژمارەی نەخۆشانی کۆرۆنا بەڕێوەچوو.

بەپێى بڵاوکراوەیەکى وەزارەتى تەندروستى حکومەتى هەرێم، کردنەوەی نەخۆشخانەی زیاتری تایبەت بە چارەسەرکردنی توشبوانى کۆرۆنا، بەشێکە لە پلانى پێشوەختە بۆ بەرەنگاربونەوەی شەپۆل و هەڵکشانی ئێستای ڤایرۆسی کۆڕۆنا کە بە خێرایی و ئاستێکی بەرز دستیپێکردوە.

هاوکات لە کۆبونەوەى ئەمڕۆى وەزیرى تەندروستى و بەڕێوەبەرایەتى گشتى تەندروستى هەولێر لەگەڵ بەڕێوەبەرى نەخۆشخانەکان،  بڕیاردراوە ریزبەندى نەخۆشخانەکان بکرێت بەپێى ئامادەییان بۆ وەرگرتنی توشبوانى کۆرۆنا و پێداویستیەکانی دەرمان و پزیشکی و ئامێر و کارگە و پێداویستیەکانی ئۆکسجین.

379 جار خوێندراوەتەوە