وەزارەتى تەندروستى حکومەتى هەرێم گۆرانکارى دەکات لە رێکارەکانى خۆپارێزى لە ڤایرۆسى کۆرۆنا لە فڕۆکەخانە و دەروازە سنورییەکان و شێوازى ئەنجامدانى پشکنین بۆ ئەو هاوڵاتیانەى لەدەرەوەى هەرێمى کوردستان دەگەڕێنەوە.

دکتۆر ئاسۆ حەوێزى، وتەبێژى وەزارەتى تەندروستى حکومەتى هەرێمى کوردستان رایگەیاند، دوابە دوای ڕەچاوکردنی ئاستی ڕەوشی تەندروستی و ئاسایی بوونەوەی هاتووچۆ و گەشتکردن و ئاسانکاری بۆ هاوڵاتیان لە گرتنەبەری رێكارەكانی خۆپارێزی و وەرگرتنی نموونە بۆ پشكنینی ڤایرۆسی كۆرۆنا، بڕیاریانداوە وەرگرتنی نموونە و پشكنینی ڤایرۆسی كۆرۆنا بۆ هاوڵاتیانە ئەنجام نەدەن كە لە ڕێگەی دەروازە سنووریەكان و فرۆكەخانەكان دەگەڕێنەوە و دەرەنجامی پشكنینی ڤایرۆسی كۆرۆنای پشتڕاستكراو و باوەڕپێكراوی هەبێت و كەمتربێت لە (48) كاتژمێر.

راشیگەیاند، هەروەها ئەو هاوڵاتیانەى کە بڕوانامەى وەرگرتنى ژەمى دووەمى ڤاکسینى دژە کۆرۆنای پشتراستکراو و باوەرپێکراوى هەبێت، بەهەمان شێوە پشکنینى ڤایرۆسى کۆرۆناى بۆ ئەنجام نادرێت.