سەرۆکى شارەوانى مۆسکۆ، بەمەبەستى رێگریکردن لە زیاتر بڵاوبونەوەى کۆرۆنا لە شارەکە هەفتەیەک پشوى راگەیاند.

سێرگی سۆبیانین، سەرۆکی شارەوانی مۆسکۆ لە بڕیارێکدا هەفتەیەک پشوى لە مۆسکۆ راگەیاند و وتى: بۆ راگرتنى رێژەى بەرزى توشبون و رزگارکردنى ژیانى خەڵک، بڕیارێکم واژۆکرد بۆ ماوەى هەفتەیەک لە (12 بۆ20)ى ئەم مانگە لە مۆسکۆ پشوى فەرمى دەبێت.

بەپێى دواین راگەیەنراوى شارەوانى مۆسکۆ، تەنها دوێنێ شەممە شەش هەزار و (701) توشبوى نوێى کۆرۆنا لە مۆسکۆى پایتەخت تۆمارکراون.

هاوکات بەپێى داتا تەندروستییەکانى روسیا لە ئێستادا ژمارەى توشبوان بە ڤایرۆسى کۆرۆنا بەرزترینە لە ماوەى سێ مانگى رابردودا، تائێستاش پێنج ملیۆن و (193) هەزار کەس لە تەواوى روسیا توشى کۆرۆنا بوون و شەشەم وڵاتە لەسەر ئاستى جیهان لە ژمارەى توشبواندا.