وتەبێژى بزوتنەوەى گۆڕان: ئەولەویەت لاى ئێمە بەدەمەوەچونى داخوازییەکانى خەڵک و لابردنى لێبڕینى موچەیە

KNN : Kurdish News Network
12:39 - 04/05/2021
کوردستان

وتەبێژى بزوتنەوەى گۆڕان ناوەرۆکى کۆبونەوەکەى سەرۆکى هەرێم رێکخەرى گشتى بزوتنەوەى گۆڕان ئاشکرا دەکات، جەختیش دەکاتەوە کە بزوتنەوەى گۆڕان لەگەڵ دەستورێکى مەدەنیدایە، ئەولەوتیشیان لابردنى لێبڕینى موچە و بەدەمەوەچونى داخوازییەکانى خەڵکە.

دلێرعەبدولخالق وتەبێژى بزوتنەوەى گۆڕان لە کۆنگرەیەکى رۆژنامەوانیدا رایگەیاند، لە کۆبونەوەکەدا چەند پرسێک گفتوگۆى لەبارەوە کراوە، یەکێک لەوانە پرسى یەک گوتارى کوردە بۆ داهاتوى عێراق و چۆنیەتى پاراستنى دەسکەوتەکانى کورد لە بەغدا.

راشیگەیاند، پرسێکى دیکە کە گفتوگۆى لەبارەوەکرا پرسى نوسینەوە و تەواوکردنى دەستورى هەرێمى کوردستانە، ئێمە لەگەڵ دەستورێکى پیشکەتوو مەدەنیدان، دەستورێک کە سیستەمى پەرلەمانى و سەروەرى یاسا و شەفافیەت و پرەنسیپەکانى لامەرکەزى لە خۆیدا کۆبکاتەوە.

لە بەشێکى دیکەى قسەکانیدا وتەبێژى بزوتنەوەى گۆڕان رایگەیاند، بەسەرۆکایەتى هەرێممان راگەیاند کە لەگەڵ بەرفراوانکردنى ئازادییە گشتى و مەدەنییەکانین، پێویستە ئازادییەکان زیاتر بپارێزرێت و مافى رۆژنامەنوس وچالاکوانان زیاتر بپارێزرێت.

وتەبێژى بزوتنەوەى گۆڕان جەختى کردەوە، ئێمە لەگەڵ ئەنجامدانى چاکسازى سیاسى و بەدەمەوەچونى داخوازییەکانى خەڵکین، ئەولەویەتیش لاى ئێمە دابینکردنى موچە و هەوڵدانە بۆ لابردنى لێبڕینى موچە و قۆرخکارى بازاڕ لەلایەن حزبە دەسەڵاتدارەکانەوە.

531 جار خوێندراوەتەوە