وەزارەتی ناوخۆی هەرێمی کوردستان قەدەغەى هاتوچۆى نیمچەیى راگەیاند و بەپێى بڕیارە نوێکەش، قەدەغەی هاتووچۆی ئۆتۆمبێل و پیادە لە تەواوی پارێزگاکانی هەرێمى کوردستان ئیدراە سەربەخۆکان و گشت یەکە کارگێڕییەکانیان لە کاتژمێر (08:00)شەو تا (06:00) بەیانی دەبێت.

لە راگەیەنراوێکدا، وەزارەتى ناوخۆى هەرێمى کوردستان چەند بڕیارێکى نوێى راگەیاند کە گرنگتیرنیان قەدەغەى هاتوچۆى نیمچەییە لە تەواوى سنورى هەرێمى کوردستان.


بڕیارە نوێیەکانی وەزارەتی ناوخۆ

یەكەم: قەدەغەی هاتووچۆی ئۆتۆمبێل و پیادە لە تەواوی پارێزگاكانی هەولێر و سلێمانی و دهوك و هەڵەبجە و ئیدارە سەربەخۆكانی راپەرین و گەرمیان و گشت یەكە كارگێڕییەكانیان لە كاژێر (08:00)ی شەو تاوەکو (06:00)ی بەیانی.

دووەم: بەدەر لە خاڵی (یەكەم)ى سەرەوە، رێگە دەدرێت بە هاتووچۆكردنی ئۆتۆمبێلی ئاژانس و رێكخراوەكانی (UN) و رێكخراوە نێودەوڵەتییەكان و هاوپەیمانان و دیپلۆماتكاران و ئۆتۆمبێلی هێزە ئەمنییەكان و تیمە تەندروستیيەكان و كۆمپانیاكانی نەوت و كۆمپانیاكانی پەیوەندییەكان و ئۆتۆمبێلی ئەمبوڵانس و رۆژنامەوانان، ئەوانەی لە ئەركی فەرمیدان.

سێیەم: دەرمانخانە ئێشكگرەكان بە كراوەیی دەمێننەوە.

چوارەم: ئالۆگوڕی بازرگانی بەردەوام دەبێت لەنێوان پارێزگاكان و ئیدارە سەربەخۆكانى هەرێم، و لەگەڵ پارێزگاكانی عێراق.

پێنجەم: بەردەوامبوونی جێبەجێكردنی هەردوو بەیانمان ژمارە (12 و 13) جگە لەو بڕگانەی كە ناگونجێت لەگەل خاڵی (یەكەم)ی سەرەوە.

شەشەم: پێویستە ژووری ئۆپەراسیونەكان لە پارێزگا و ئیدارە سەربەخۆكان و گشت یەكە كارگێڕییەكانی دیکە، ئەم بەیانە جێبەجێ بكەن.

حەوتەم: ئەم بەیانە لە رێكکەوتی (08-04-2021 ) لە کاتژمێر(08:00)ی شەو، تاوەکو رێكکەوتی (12-04-2021 ) کاتژمێر (08:00)ی شەو جێبەجێ دەكرێت و
لە رۆژنامەی وەقایعی كوردستان بڵاودەكرێتەوە.