لە ئێستادا بەهۆى ئەو شەپۆلى بەفربارینە بەهێزەى ئیسپانیاى گرتۆتەوە، بەشێک لە ژیان و کاروبارەکانى ئەو وڵاتەى راگرتوە و ئاستەنگى قورسى هاتوچۆش دروست بوە. کەشناسى ئیسپانیاش دەڵێت: بەفر ئیسپانیاى سپى پۆشکردوە.

کەشناسى ئیسپانیا ئاشکرایدەکات، لەماوەى (50) ساڵى رابردودا یەکەمجارە شەپۆلێکى ئەوەندە کاریگەرى بەفر بارین رو لە وڵاتەکەیان دەکات، بەشێوەیەک بۆتە هۆى دروستبونى ئاستەنگى قورسى هاتوچۆى ئۆتۆمبێل و شەمەندەفەر و بەشێک لە ریگا سەرەکییەکانیش بەیەکجارى هاتوچۆکردن تێیاندا وەستاوە.

هەر بەهۆى ئەو شەپۆلەوە، فڕۆکەخانەى باراخاسى نیودەوڵەتى لە مەدریدى پایتەخت داخراوە و شەوى رابردوش لەژێر کاریگەرى شەپۆلەکە یاریزانانى ریاڵ مەدرید توشى ئاستەنگى فڕین و نیشتنەوەى فڕۆکەکەیان بون.

ئەوە لە کاتێکدایە، چەند یارییەکى گرنگ لە خولى پلە یەک و پلە جیاوازەکانى ئیسپانیا بەهۆى بەفربارینەوە وەستێنراون بەتایبەت یارى لوتکەى لە نێوان ئەتڵەتیکۆ مەدرید و ئەتلەتیک بلباو.