لیژنه‌كانی قائیمقامیه‌تی سلێمانی؛ له‌دو رۆژی رابردودا (35) پسوڵه‌ی سه‌رپێچی تۆمار دەکەن

KNN : Kurdish News Network
12:33 - 22/11/2020
کوردستان

به‌هۆی سه‌رپێچیكردن له‌ رێنماییه‌كانی كاركردن و خۆپارێزی، له‌ دو رۆژی رابردودا لیژنه‌ هاوبه‌شه‌كانی قائیمقامیه‌تی سلێمانی (35) پسوڵه‌ی سه‌رپێچییان تۆماركردوه‌.

له‌شكر حه‌مید، سه‌رۆكی لیژنه‌ هاوبه‌شه‌كانی قائیمقامیه‌تی سلێمانی رایگه‌یاند: به‌هۆی پابه‌ند نه‌بون به‌ رێنماییه‌كانی ته‌ندروستی و ڤێتێرنه‌ری و جێبه‌جێ نه‌كردنی رێكاره‌كانی خۆپارێزی له‌ شوێنه‌كانیاندا، له‌ دو رۆژی رابردودا لیژنه‌ هاوبه‌شه‌كان (35) پسوڵه‌ی سه‌رپێچیان تۆماركردوه‌.

وتیشی: له‌كاتی شكاندنی كه‌ره‌نتینه‌دا رێنمایی به‌سه‌رجه‌م شوێنه‌كان دراوه‌ تائه‌و كاته‌ی مه‌ترسی بڵاوبونه‌وه‌ی ڤایرۆسی كۆرۆنا هه‌یه‌، پێویسته‌ رێكاره‌كانی خۆپارێزی له‌دوكان و بازاڕ و شوێنه‌ گشتییه‌كاندا جێبه‌جێ بكرێت، به‌پێچه‌وانه‌وه‌ له‌لایه‌ن  لیژنه‌ هاوبه‌شه‌كانی قائیمقامیه‌تی سلێمانیه‌وه‌ روبه‌ڕوی رێكاری یاسایی توند ده‌كرێنه‌وه‌.

له‌شكر حه‌مید، وتی: له‌كاتی سه‌ردانی لیژنه‌كاندا بۆ شوێنه‌كانیان، به‌شێك له‌ خاوه‌نه‌كانیان به‌بیانوی رێنماییان نه‌كراوه‌ پابه‌ندی مه‌رج و رێنماییه‌كانی كاركردن و رێكاره‌كانی خۆپارێزی نابن، به‌ڵام پێشتر له‌رێی هۆكاره‌كانی راگه‌یاندن و سه‌ردانه‌كانی لیژنه‌كان سه‌رجه‌م شوێنه‌كان ئاگادار كراونه‌ته‌وه‌ بۆیه‌ هه‌ر شوێنێك پابه‌ند نه‌بێت داده‌خرێت و خاوه‌نه‌كه‌شی روبه‌ڕوی رێكاره‌ تونده‌كانی یاسا ده‌كرێته‌وه‌.

226 جار خوێندراوەتەوە