وەزیری کارەبای هەرێم رایگەیاند، کیشەی سەرەکی لە ژێرخانی بەرهەمهێناندا نییە، چونکە توانای شەش هەزار و (737) میگاوات کارەبا هەیە، بەڵکو کێشەی سەرەکی نەبوونی سوتەمەنییە بۆ بەگەڕخستنی بەرهەمهێنانی کارەبا.

 کەمال محەمەد وەزیری کارەبای حکومەتی هەرێمی کوردستان، رایگەیاند، توانای بەرهەمهێنانی شەش هەزار و (737) مێگاوات کارەبامان هەیە بەڵام بەهۆی قەیرانی دارایی و نەبوونی بودجەی پێویست تەنیا دەتوانرێت سێ هەزار و (650) مێگاوات کارەبا بەرهەمبێت.

ئاماژە بەوەشکردووە، لەگەڵ هاتنی وەرزی زستان خواست لەسەر بەکارهێنانی کارەبا زیاد دەبێت، بەڵام ئەمساڵ کەمکردنەوەی سەرپێچییەکان و دانانی پێوەری زیرەک و چاکسازی لە وێستەگە و تۆڕەکانی کارەبا، هۆکاری سەرەکی دەبن بۆ کەمکردنەوەی گرفت و کێشە تەکنیکییەکان.

وەزیری کارەبا دەشڵێت، دەیانەوێت لە رێگەی کەرتی تایبەتەوە کێشە و گرفتەکانی کارەبا لە هەرێم چارەسەر بکەن، کە رێگەیەک دەبێت بۆ کەمکردنەوەی سەرپێچی و بەفیرۆنەدانی کارەبا و کەمکردنەوەی سولفەی مانگانەی بەڕێوەبەرایەتییەکانی کارەبای شارەکان لەسەر حکومەت.