بۆچی پیاوان زیاتر لە ژنان توشی كۆرۆنا دەبن؟

06:42 - 28/08/2020
تەندروستی

لە ساتی بڵاوبونەوەی ڤایرۆسی كۆرۆناوە لە مانگی كانونی یەكەمی رابردوەوە، دەركەتووە رێژەی توشبونی پیاوان بە ڤایرۆسەكە لە ژنان زیاترە، چەند توێژینەوەیەك هەوڵیانداوە لە هۆكاری ئەو جیاوازییە تێبگەن.

ئەنجامی توێژینەوەیەكی نوێ ئاشكرای دەكات، وەڵامدانەوەی بەرگری لەش بۆ ڤایرۆسی كۆرۆنای نوێ لای ژنان بەهێزترە بەراورد بە پیاوان، ئەوەش هۆكاری توشبونی رێژەیەكی زیاتری رەگەزی نێرە بە ڤایرۆسەكە.

پڕۆفیسۆر ئاكیكۆ ئیوازاكی، كە یەكێكە لە پسپۆڕەكانی زانكۆی ییل لە ئەمریكا و سەرۆكایەتی توێژینەوەكەی كردووە رایدەگەیەنێت، ژنان و پیاوان خاوەنی دوو وەڵامدانەوەی جیاوازی بەرگرین بۆ روبەڕوبونەوەی ڤایرۆسەكان.

ئیوازاكی كە پسپۆڕی زانستی بەرگری لەشە دەڵێت: "ئەو جیاوازییە هۆكاری توشبوونی ژمارەیەكی زیاتری پیاوانە بە كۆرۆنا"، توێژینەوەكە كە لە گۆڤاری (Nature)ی زانستیدا بڵاوكراوەتەوە باسی لەوەش كردووە، رێژەی مردنی پیاوان بە كۆرۆنا زیاترە و دەگاتە (60%).

توێژینەوەكە ئاشكراشی كردووە، كاری ئەو خانە لیمفاوییانەی خانە توشبووەكان بە ڤایرۆس دەكوژن كە بە لیمفۆسایتی تی ناسراون، لایەنێكی دیكەی وەڵامدانەوەی بەرگری لەش دژی ڤایرۆسەكە دیاری دەكات، ئەو خانانەش لای ژنان بەهێزترن.

پسپۆڕەكان باسیان لەوەش كردووە لەشی پیاوان لە قۆناغێكی سەرەتای توشبوون بە ڤایرۆسەكەدا بڕێكی زیاتری پرۆتینی سیتۆكین بەرهەم دەهێنێت، ئەو زیاد بونەش بەهۆی لەدەست دەرچونی كۆئەندامی بەرگری لەشە لەكۆنتڕۆڵ بەهۆی ڤایرۆسەكەوە.

لاوازی خانەكانی لیمفۆسایتی تی لای پیاوان بەراورد بە ژنان بەپێی تەمەنیش دەگۆڕێت، بەجۆرێك تا تەمەنی پیاوەكە گەورەتربێت خانەكان بێهێزترن و وەڵامدانەوەیان لاوازترە.

سەبارەت بە دۆخی تەندروستی ئەو كەسانەی توشی ڤایرۆسەكە دەبن، توێژینەوەكە باسی لەوە كردووە، كە بەپێی رەگەز گۆڕاوە، بەجۆرێك ئەو ژنانەی بڕێكی زیاتری پڕۆتینی سیتۆكینیان دەرداوە لە سەرەتای توشبوونیاندا، ئەوا تەندروستیان بەرەو خراپی چووە.

توێژەرەكان پێشبینی دەكەن ئەم ئەنجامانە كاریگەری لەسەر دروستكردنی چارەسەری كۆرۆنا هەبێت و بەپێی رەگەزەكەی جۆری چارەسەرەكە بگۆڕێت.

ئاكیكۆ ئیوازاكی سەرپەرشتیاری سەرەكی توێژینەوەكە داوای لە پیاوان كردووە، لەڕێی دەرزییەوە خانەكانی لیمفۆسایتی تی لە لەشیاندا بەهێز بكەن، بەڵام ژنان باشترە كۆنتڕۆڵی دەردانی پرۆتینی سیكۆتین بكەن بۆ باشتربونی تەندروستیان و بەهێزكردنی بەرگری لەشیان.

740 جار خوێندراوەتەوە