ناسح مەلا حەسەن پاش (20) ساڵ خزمەتکردن لە فەرمانگەکانى حکومەتدا، ئەمڕۆ لە کۆتا ئەرکیدا وەک قائیمقامى قەزاى دەربەندیخان، کۆتایى بە خزمەتکردنى کاگێڕى هات و داواکارى گشتى قەزاکەش ستایشى رۆڵ و خزمەتەکانى بەبێ جیاوازى بۆ خەڵکى قەزاکە دەکات.

ناسح مەلا حەسەن قائیمقامى قەزاى دەربەندیخان لە لێدوانێکدا بۆ دیجیتاڵ میدیاى (KNN) وتى: "پاش (20) ساڵ خزمەت لەفەرمانگەکانی عێراق و هەرێمدا، ئەمڕۆ کۆتا ڕۆژى کارکردنم بووە و تەمەنى خزمەت کردنم کۆتایى پێهاتوە".

ناسح مەلا حەسەن لەبەروارى (10/5/2015)ـەوە وەک قائیمقامى قەزاى دەربەندیخان دەستەبکاربوە، ئاماژە بەوەش دەکات، لە دەستبەکاربونیەوە وەک قائیمقام، قەیران بە قەیران روبەڕویان بوەتەوە، بەڵام توانیویانە بەردەوامبن لە خزمەت کردن و لە ماوەى کارکردنیدا چەندین پڕۆژە جێبەجێ کراوە، لەوانەش: پڕۆژەی بەنداوی دێوانە، پرۆژەی نۆژەنکردنەوەی بەنداوی دەربەندیخان دوای بومە لەرزەکە، پرۆژەی قیرتاوکردنی شەقامی سەرەکی ناوشارى دەبەندیخان، نۆژەنکردنەوەی ڕێگای دەربەندیخان – وارماوا، رێگای دووسایدی دەربەندیخان - کەلار (دەستی پێکردەوە).

ناسح مەلا حەسەن ئەوەش دەخاتەڕوو، کە ئەوەی لە توانایدابوە کردویەتى بۆ خزمەتکردنى قەزاکە و دەڵێت: "دەرونم ئاسودەیە لە بەردەم خوا و میلەتەکەم و بزوتنەوەی گۆڕاندا کەمنی راسپارد بۆ ئەوئەرکە، بەڵام زۆرجار گرفت و ئاستەنگ و بەربەستەکان لەسەرو و توانا و دەسەڵاتی منەوە بوە".

هاوکات سوپاسى هەموو بەڕێوەبەری فەرمانگەکان و هێزە ئەمنیەکان و فەرمانبەر و کارمەندەکانیان و لیژنەکانی قائیمقامیەت دەکات، کە سەرجەمیان بەگیانێکی هەستکردن بە بەرپرسیارێتیەوە کارەکانی خۆیان ئەنجامداوە.