زۆرینەی هاوڵاتیانی روسیا بەبەڵی دەنگیان بە هەمواری دەستوردا

08:57 - 02/07/2020
جیهان

پرۆسەی هەمواری دەستوری ڕوسیا خرایە دەنگدانەوە و بەپێی ئەنجامە سەرەتاییەکان سەدا 77 هاوڵاتیانی وڵاتەکە بە بەڵی دەنگیان داوە.

 

میدیاکانی روسیا بڵاویانکردەوە ئەگەر هەیە ئەمڕۆ ئەنجامی کۆتایی بڵاوبکرێتەوە و سەرەکیترین بڕگەی هەموارەکەش لەبەرژەوەندی ڤلادمیر پۆتینە کە رێگەی پێ دەدات هەتا ساڵی 2036 لە پۆستەکەیدا بمێنێتەوە.

 

بەپێی هەموارە تازەکەی دەستوری ڕوسیا، ساڵەکانی پێشتری سەرۆکایەتی بۆ پۆتین هەژمارناکرێت و لە هەڵبژاردنی ئایندەوە هەتا ماوەیەکی درێژ دەتوانێت خۆی هەڵبژێرێتەوە.

 

هەروەها یەكێکی دیکە لە بڕگەکانی هەموارەکە ئەوەیە ئەو کەسەی خۆی بۆ سەرۆکایەتی هەڵدەبژێرێت، پیویستە خاوەنی ڕەگەزنامەی هیچ وڵاتێکی دیکە نەبێت و ماوەی 25 ساڵیش بێت لە روسیا بژێت.

 

بڕگەیەکی دیکە ئەوەیە دەسەڵاتێکی زۆر دەدات بە سەرۆک و سەرۆک دەتوانێت لەکاتی هەندێک دۆخدا سەرۆک وەزیران و وەزیرەکان لە کارەکانیان دوربخاتەوە.

 

بەشێکی دیکە لە بڕگەکانی هەمواری دەستوری ڕوسیا پەیوەندی بەژیانی کۆمەڵایەتیەوە هەیە و رێگە بە هاوسەرگیری کچ و کچ یان کوڕ و کوڕ نادرێت،ئەمە جگە لە رێکخستەوەی خانەنشینی و دیاریکردنی موچەی فەرمانبەران بەو شێوەیەی کە پێویستە بۆ هەر کەسێک.

377 جار خوێندراوەتەوە