ڕێکخراوی تەندروستی جیهانی رایگەیاند، پێویستی بە (31 ملیارو 300 ملیۆن دۆلار) هەیە لە ماوەی (12) مانگی داهاتوودا بۆ پێشخستنی تاقیکردنەوەکان، چارەسەری و بەرهەمهێنانی ڤاکسین.

 
ڕێکخراوەکە دەڵێت،سێ ملیار و چوارسەد ملیۆن هەتا ئێستا کۆکراوەتەوە و هێشتا 27 ملیارو نۆ سەد ملیۆن دۆلار ماوە کە 13 ملیار و 7 سەد ملیۆنی ئەو بڕە پارەیە دەستبەجێ پێویستە.

داواکارییەکەی رێکخراوی تەندروستی جیهانی لە کاتێکدایە، هەوڵ دەدات 500 ملیۆن تاقیکردنەوە و 245 ملیۆن کۆرسی چارەسەرکردن هەتا ناوەڕاستی ساڵی 2021 بگەیەنێت بە وڵاتانی هەژار و مامناوندی.

تەندروستی جیهانی لەگەڵ ڕێکخراوە هاوپەیمانەکانی دروستکردنی دەرمان، دابین کردنی دارایی و بڵاکردنەوەی کەرەستەی پێویست سەنتەرێکیان بە ناوی ACT-Acceleratorپێکهێناوە، بۆ خێراکردنی توێژینەوەو چارەسەری ڤایرۆسی کۆرۆنای جۆری کۆڤید19.

سەبارەت بە کارەکانی ئەو نێوەندەی کە لە مانگی 4 بۆ خێراکردنی کارەکان دامەزرا، WHO و گروپە تەندروستییە جیهانییەکان دەڵێن پەتای کۆرۆنا هێشتا هەڕەشەیە بۆ سەر ژیانی ملیۆنان کەس و زیان گەیاندن بە ئابوری لە جیهاندا.

ڕێکخراوەکە دەڵێت تێچوونی تەواوی کارەکانی ACT-Accelerator زۆر لەو پارەیە کەمترە کە سندوقی بانکی جیهانی دەڵێت مانگانە ئابوری جیهانی لەدەستیدەدات بەهۆی پەتای کۆرۆناوە.