بەشێک لە مامۆستایان و فەرمانبەرانى زانکۆ داوا لە وەزیرى خوێندنى باڵا دەکەن لەبارەى کەمنەکردنەوەى موچەکانیانەوە دڵنیاییان پێ بدات.

 لەنامەیەکدا بۆ وەزیرى خوێندنى باڵاى حکومەتى هەرێم بەشێک لە مامۆستایان و فەرمانبەرانى وەزارەتى خوێندنى باڵا داوایەکیان ئاراستەى وەزیر کردووە و دەڵێن: سەبارەت بەو هەواڵ و زانیاریی و دوودڵییەى مامۆستایان و فەرمانبەرانى وەزارەتەکەتان، بەدواداچوون و رونکردنەوە و دڵنیایی بە مامۆستایان و فەرمانبەرانى وەزارەتى خوێندنى باڵا بدەن.

ئەو مامۆستا و فەرمانبەرانەى وەزارەتى خوێندنى باڵا لەنامەکەیاندا دەشڵێن، “ئێمە لەگەڵ چاکسازیداین، بەڵام چاکسازییەک خزمەت بە رەوشی ئابوریی و ئیداریی و دارایی حکومەت بکات، چاکسازییەک لانى کەمى عەدالەت و دادى کۆمەڵایەتى بێنێتەدى، نەک لەسەر حیسابى قوت و ژیانى ئێمە خەڵکانى تر لە یاساکە ڕیزپەڕ بن” .

ئاماژەیان بەوەشداوە، بڕیارى چاکسازیکردن لە کابینەى نۆیەمى حکومەتى هەرێم و دەرچوواندنى یاسای چاکسازیی لە پەرلەمانى کوردستان، جیاکردنەوەى مووچەخۆرى ڕاستەقینە و ماندووە لە مووچەخۆرى بن دیوار و حیزبیی و خزمەتکاری بەرپرسەکان.