ئەنجامی توێژینەوەیەكی پزیشكی ئاشكرای دەكات، ئەو منداڵ و هەرزەكارانەی كێشەی قەڵەوی و كێشی زیادی لەشیان هەیە، ئەگەری زیاترە توشی نەخۆشی ڕەبۆبن.

توێژینەوەكە لەلایەن چەند پسپۆڕێكی ناوەندی (بیدیا ترێكس) لە ئەمریكا ئەنجامدراوە، كە ناوەندێكی تایبەتە بە تەندروستی منداڵان و هەرزەكاران.

پسپۆڕەكان بۆ ماوەی چوار ساڵ چاودێری (500) كەسیان كردووە كە تەمەنیان لەنێوان  (2 – 17) ساڵیدا بووە، لەو ماوەیەشدا (8%) ئەو كەسانە توشی نەخۆشی ڕەبۆ بوون و زۆرینەیشیان لەوانە بوون كە قەڵەوبون.

پسپۆڕەكان بۆیان دەركەوتووە، ئەگەری توشبون بە نەخۆشی ڕەبۆ بەپێی تەمەنەكان گۆڕاوە، بەجۆرێك ئەو منداڵانەى کێشیان زۆربووە ئەگەری توشبوونیان بە ڕەبۆ بەڕێژەی (17%) زیاتر بووە بەراورد بەوانەی كێشیان ئاسایی بووە، هەرزەكارەكانیش ئەگەری توشبوونیان بەو نەخۆشییە بەڕێژەی (26%) زیاتربووە بەراورد بەوانەی كە هاوتەمەنیان بوون، کێشیان زۆر نەبووە.

توێژینەوەكە ئاماژەی بەوە كردووە كۆنترۆڵكردنی كێشی منداڵان و هەرزەكاران سودێكی زۆری بۆ تەندروستیان هەیە و بەڕێژەی (10%) توشبووانی ڕەبۆ كەمدەكاتەوە، ئەمە جگە لە سودە تەندروستییەكانی بۆ تەمەنی بچوك و گەورەیی منداڵەكە.