ئاسایى کردنەوەى ژیانى هاوڵاتیان پاش قەدەغەى هاتوچۆ، بە قۆناغبەندى دەست پێدەکات و ژمارەیەک لە دوکان و بازاڕەکانى سلێمانى دەکرێنەوە.

بەپێى زانیاریەکانى بڕیار نامیق پەیامنێرى دیجیتاڵ میدیاى KNN، ئێوارەى ئەمڕۆ لە سلێمانى لە کۆنگرەیەکى رۆژنامەوانى هاوبەشى پارێزگار و قائیمقام و بەڕێوەبەرى گشتى تەندروستى سلێمانیدا، ئەو بڕیار و رێنماییە نوێیانە بڵاودەکرێنەوە کە لەپێناو ئاسایى کردنەوەى ژیانى هاوڵاتیاندایە لە پارێزگاکەدا.

بەپێى زایناریەکانى دیجیتاڵ میدیاى KNN، سەرجەم سەرتاشخانەکانى ناو گەڕەکەکان دەکرێنەوە، بەدەر لەو سەرتاشخانانەى کە لەشەقامەکانى (قەنات، پیرەمێرد، حەمدى، کاوە و ئۆرزدى)ن.

هاوکات مارکێتە گەورەکانى دەرەوەى سەنتەرى شار و سەرجەم دوکانى گۆشت فرۆش و مریشک فرۆشەکانى ناو گەڕەکەکان دەکرێنەوە.

دیجیتاڵ میدیاى KNN لە سەرچاوەیەکى تایبەتەوە ئەوەشى زانیوە، کە سەرجەم خواردەمەنیەکانى دەرەوەى سەنتەرى شارى سلێمانى دەکرێنەوە، بەمەرجێک بەشێوەى گەیاندن خواردن پێشکەش بکەن و دوکانى مۆبایلەکانیش دەکرێنەوە.

بەشێکى دیکەش لەو شوێنانەى دەکرێتەوە، کارگەى چیمەنتۆ و بلۆک و چەو و لم و کەرەستە بیناسازیەکان و سەرجەم کۆمپانیا بازرگانیەکانن.

کردنەوەى ئەم شوێنانە لە سلێمانى لەکاتێکدایە، شەوى رابردوو دیجیتاڵ میدیاى KNN وەک یەکەمین دەزگاى میدیایى لە هەرێمى کوردستاندا، هەواڵى ئاسایى کردنەوەى ژیانى هاوڵاتیانى لەزارى هەریەکە لە پارێزگار و قائیمقام و بەڕێوەبەرى تەندروستیەوە، بەشێوەیەکى راستەوخۆ بڵاوکردەوە و بەشێکى زۆرى دەزگا میدیاییەکان بەبێ رەچاوکردنى ئیتیکى کارى رۆژنامەنوسى و ناوهێنانى سەرچاوەى هەواڵەکە، کە (دیجیتاڵ میدیاى KNN)ـە، هەواڵەکەیان بڵاوکردەوە.