پلانی تەندروستی سلێمانی بۆ ئاسایکردنەوەی ژیان دوای 48 کاتژمێرەکە

10:35 - 04/04/2020
کوردستان

بەڕێوەبەرایەتی تەندروستی سلێمانی پلانی خۆی داناوە بۆ چۆنیەتی ئاسایکردنەوەی ژیان لەدوای ٤٨ کاتژمێرەکە، پلانەکەش لەلایەن لایەنە پەیوەندیدارەکانەوە پەسەندکراوە،

 

 

سەرچاوەیەکی بەرپرس لە تەندروستی سلێمانی بە دیجیتاڵ میدیای KNN ی ڕاگەیاند، پرۆژەیەک ئامادەکراوە بۆ ئەوەی بە قۆناغ ژیان ئاسایی بکرێتەوە و پرۆژەکەش ناوی پرۆژەی (پلانی جێگرەوەی قەدەغەی هاتوچۆ)یە.

 

 

سەرچاوەکە ڕایگەیاند لەدوای ٤٨ کاتژمێرەکە قەدەغەی هاتوچۆ تا 10ی مانگ هەر بەردەوام دەبێت، بەڵام بە پلانێک دوکان و بازاڕەکان دەکرێنەوە ئەویش بە پێی چەند رێنمایی و مەرجێک.

 

 

 

ئەو سەرچاوەیەی تەندروستی سلێمانی بە بڕیار نامیق پەیامنێری دیجیتاڵ میدیای KNN ی ڕاگەیاندوە، هەموو دوکاندار و نانەوایەک دەبێت ماسک و دەستکێش ببەستن و بەتایبەت ئەو کەسانەی پارە وەردەگرن نابێت بەهیچ شێوەیەک دەست لە خواردنەکان بدەن و لیژنەکانی قایمقامیەتیش بە وردی چاودێری جێبەجێکردنی رێنماییەکان دەکەن.

 

 

 

هەروەها هەتا کۆتایی ئەم مانگە شوێنە گشتیەکانی وەک خوێندنگاکان و بازاڕەکان ناکرێنەوە،بەڵکو تەنیا مارکێتی و دوکانی کۆڵانەکان و شوێنە کەم قەرەباڵغەکان دەکرێنەوە.

 

 

هەر بەپێی پلانەکە، قۆناغ بە قۆناغ ژیان ئاسایی دەکرێتەوە. ڕێگە بە دروستکردنی هیچ جۆرە قەرەباڵغیەک نادرێت و هەتا ماوەیەکی دیکەی درێژ ڕێگە بە کردنەوەی کافتریا و مۆڵ و ڕیستۆرانتەکان نادرێت.

 

 

 

سەرچاوەکەی تەندروستی سلێمانی ئەوەشی ئاشکراکرد،لەدوای ٤٨ کاتژمێرەکە رێکارەکانی ئاسایی کردنەوەی ژیان و ڕێنماییەکان بڵاودەکرێنەوە و هاوڵاتیانی لێ ئاگادار دەکرێنەوە.

 

 

 

بەشێکی دیکەی پرۆژەکە،بریتیە لە تاک پارێزی، واتا لە دوای نەمانی قەدەغەی هاتوچۆ، ئیتر پێویستە هاوڵاتیان خۆیان خۆیان بپارێزن و لەکاتی چونە سەر کار و بازاڕ و شوێنە گشتیەکان ئاگاداری خۆیان بن و تێکەڵی نەکەن و قەرەباڵغی دروست نەکەن.

45066 جار خوێندراوەتەوە