وەزارەتی دارایی رێنمای وەرگرتنەوەی قەرزی بازرگان و کۆمپانیاکانی دەرکرد و ئاراستەی بانکە بازرگانیەکانی بۆ جێبەجێکردن.

 

بەپێی رێنمایەکە کە لە سایتی فەرمی وەزارەتدا بڵاوکراوەتەوە، ئاماژە بەوەکراوە دەبێت لە ماوەی سێ مانگدا واتا هەتا مانگی ئایار سەرجەم قەرزی لای کۆمپانیا و بازرگانەکان وەربگیرێتەوە.

 

بەپێی نوسراوەکە کە لە رۆژی ١٠ ئەم مانگە دەرچووە و ئیمزای ئاوات شێخ جەناب وەزیری دارایی لەسەرە، داواکراوە هەر کۆمپانیا و بازرگانێک لەماوەی سێ مانگدا قەرزەکانی نەگێڕایەوە، دەبێت ئەو موڵکانەی بەرەهن دایاناوە لەبری قەرزەکە بفرۆشرێن.

 

لە رێنماییەکەی وەزارەتی داراییدا ئەوەش هاتووە، دەبێت لایەنە پەیوەندیدارەکان هاوکار و هەماهەنگ بن بۆ جێبەجێکردنی فرۆشتنی موڵکەکان، بە تایبەت وەزارەتی داد.

 

لە نوسراوەکە ئاماژە بەوەکراوە،گەڕانەوەی قەرزەکان بە چەکی بانکی یاخود کاش بەپێی یاسا و ڕێنماییەکانی پەیڕەوەکراو لە بانکە بازرگانییەکان بێت، هەروەها چەکە بانکییەکان بەناوی قەرزارەکانەوە بێت و چەکی بانکە بازرگانیەکانی حکومەتی هەرێمی کوردستان بێت بە مەبەستی پاکتاوکردنی قەرزەکانیان و بە هیچ شێوەیەک چەکی بانکی ئەهلی نەبێت.

 

ئەوە لەکاتێکدایە بەپێی یاسای چاکسازی کە لەماوەی رابردوو پەرلەمانی کوردستان پەسەندیکرد، حکومەتی هەرێم پابەندکراوە قەرزی لای کۆمپانیا و بازرگانەکان وەربگرێتەوە کە رێژەکەی ٨٠٠ ملیار دینارە.

1331 جار خوێندراوەتەوە