پۆلیسی مەدینە رایگەیاند، کەسێکی بە رەگەز عێراقییان دەستگیرکردووە، کە لەناو خەڵکی مەدینەدا بانگەشەی چاککردنەوەی کەسانی کوێر و نەخۆشی کردووە.

حسین قەحتانی وتەبێژی پۆلیسی مەدینە وتی، ئەو کەسەی دەستگیرکراوە تەمەنی ٥٠ ساڵ دەبێت، دوای ئەوەی ڤیدیۆکانی بڵاوکراوەتەوە لە شاری مەدینە، گوایە چارەسەری نەخۆش دەکات، بەدوایدا گەڕاون و دەستگیریان کردووە.

قەحتانی ئاماژەی بەوەش کردووە، رێوشوێنی پێویستیان بەرامبەر ئەو کەسە گرتووەتە بەر و لە ئێستادا راگیراوە.

دوای لێدوانەکەی وتەبیژی شاری مەدینە، چەند پەڕەیەکی تۆڕە کۆمەڵایەتییەکان لە شاری مەدینە، ڤیدیۆی مەلا عەلی کەڵەکیان داناوە کە لە شاری مەدینە "بانگەشەی چارەسەری نەخۆش" دەکات و نووسیویانە ئەم کەسە کە ناوی "ملا علی"یە، بانگەشەی چارەسەرکردنی نەخۆش دەکات، بۆیە لەلایەن پۆلیسەوە دەستگیرکراوە.

تا ئێستا مەلا عەلی کەڵەک یان کەسێکی نزیکی، لەبارەی ئەم هەواڵەوە روونکردنەوەیان بڵاونەکردووەتەوە.