سەرکردەیەکی پارتی دیموکراتی سوریا ئاشکرایکردووە کە شاندێکی ئەنجوومەنی نیشتمانی کورد (ئەنەکەسە) سەردانی مۆسکۆ دەکات و لەگەڵ بەرپرسانی ڕوسی کۆدەبنەوە.

مەحمود عەرەبۆ، سەرکردە لە پارتی دیموکراتی سوریا ئاشکرایکردووە ڕۆژی پێنجشەممە شاندێکی ئەنەکەسە لەسەر داوای وەزارەتی دەرەوەی ڕوسیا سەردانی ئەو وڵاتە دەکات و لەگەڵ جێگری وەزیری دەرەوەی ڕوسیا کۆدەبنەوە.

ئەو سەرکردەیە ئاشکرای کردووە کە ئەوان لەگەڵ وەزارەتی دەرەوەی روسیا گفتوگۆ دەکەن لەسەر هێرشی تورکیا بۆسەر ڕۆژئاوای کوردستان و ئاوارەبوونی خەڵكی کورد لەناوچەکە.

وتوشیەتی "ڕاستەوخۆ داوا لە روسیا دەکەین پشتگیری کورد و مافەکانی بکات لە ئایندەدا و لە دەستووری نوێی سوریادا".

 ئەنجومەنی نیشتمانیی کورد یان ئەنەکەسە  دامەزراوەیکی سیاسییە لەدوای خۆپیشاندانەکانی خەڵكی سوریا و کۆنترۆڵکردنی ناوچە کوردییەکان لەلایەن کوردەوە درووستبوو، ئەم دامەزراوە سیاسییە لەگەڵ پەیەدە و تەڤدەم لە سوریا ناکۆکە و بە وتەی خۆیان کاری سیاسیان سنوردارکراوە لەلایەن پەیەدەوە.