هەسەدە: رووبەڕووبوونەوەی سەخت بەردەوامە

12:28 - 10/10/2019
کوردستان

هێزەکانی سوریای دیموکرات رایگەیاند، لە گوندە سنورییەکانی رۆژئاوا و تورکیا رووبەرووبوونەوەی سەخت لە نێوان هێزەکانیان و سوپای تورکیا بەردەوامە و تاوەکو ئێستا سەرجەم هێرشەکانی سوپای ئەو وڵاتە تێكشکێندراون.

مەڕوان قامیشلۆ بەرپرسی راگەیاندنی هێزەکانی سوریای دیموکرات رایگەیاند، رووبەرووبوونەوەی سەخت بەردەوامە و تورکیا هەوڵی داگیرکردنی گوندە سنورییەکان دەدات.

لەلایەکی دیکەوە، ئەنجومەنی گرێسپی رایگەیاند، تورکیا شارکەی کۆنتڕۆڵ نەکردووە و پێشڕەوییان نەکردووە.

 

هاوکات، کەمێک پێش ئێستا، وەزارەتی بەرگری تورکیا بڵاویکردووەتەوە، سوپای تورکیا و ئۆپۆزسیۆنی سوریا، دوو گوندیان لە ناوچەکانی رەسولیان و تەل ئەبیەز لە سنوری شاری گرێسپی کۆنترۆڵکردووە، بەڵام وەزارەتی بەرگری سوریا و هێزە کوردییەکان ئەو هەواڵە رەتدەکەنەوە.

لەبەرامبەردا هێزەکانی سوریای دیموکرات رایگەیاند، سەرجەم هێرشەکانی سوپای تورکیا لە ناوچەی سەرێکانی تێكشکێنراون و لە دوێنێوە چوار تانکی تورکیا و پێنج سەربازی ئەو وڵاتەیان کوشتووە و تورکیا هیچ پێشڕەوییەکی نەکردووە.

هاوکات وەزارەتی بەرگری سوریا رایگەیاند، دەنگۆی پێشڕەوەی و کۆنترۆڵکردنی چەند ناوچەیەک لەلایەن تورکیاوە دوورە لە راستییەوە و پێشڕەوییان نەکردووە.

لەلایەکی دیکەوە میدیاکانی تورکیا بڵاویانکردووەتەوە، لە بەیانی ئەمڕۆوە تورکیا سەرجەم بەربەرستە کۆنکرێتییەکانی نێوان رۆژئاوا و باکوری کوردستان داینابوون لابردووە و لە هەردوو ناوچەی سەرێکانیێ و گرێسپی و ئامادەکاری بۆ هێرشی زەمینی دەکرێت.

هاوکات ناوەندی ڕاگەیاندن و چاپەمەنی هەسەدە دەڵێت "لەئەنجامی هێرش و تۆپبارانەکانی تورکیا بۆسەر باکوری ڕۆژهەڵاتی سوریا لە یەکەم رۆژی هێرشەکەدا ٣ شەڕڤانی هەسەدە و پێنج هاوڵاتی سڤیل شەهیدبوون".

دوێنێ، چوارشەممە، هێرشی تورکیا بۆسەر رۆژئاوای کوردستان دەستیپێکرد و تا ئێستا بەردەوامە.


 
1043 جار خوێندراوەتەوە