ئەمڕۆ شەممە، سەرۆکی پەرلەمانی عیراق و نوێنەرانی خۆپیشاندەران لە بەغدا کۆبوونەوە و لە کۆبوونەوەکەدا نوێنەری خۆپیشاندەران چەند مەرجێکیان بۆ کۆتایهێنان بە خۆپیشاندانەکان راگەیاندووە.

ئاژانسی هەواڵیی فەرمی عێراقییە بڵاویكردەوە، محەمەد حەلبوسی لە نووسینگەكەی لە ئەنجوومەنی نوێنەران پێشوازیكردووە لە نوێنەرانی خۆپیشاندەران و كۆبوونەتەوە و لە كۆبوونەوەكەدا، داواكاری خۆپیشاندەران و ئەو توندوتیژییەی كە لە میانی خۆپیشاندانەكانی چەند رۆژی رابردوو كەوتووەتەوە، تاوتوێكراون.

بەپێی زانیاییەکان لە کۆبوونەوەکەدا نوێنەری خۆپیشاندەران چەند مەرجێکیان بە سەرۆکی پەرلەمان راگەیاندووە لەوانە دابینکردنی دامەزراندن و هەلی کار، پێدانی یەکەی نیشتەجێبوون بە کرێنشینان، بڕینەوەی مووچە بۆ خێزانە کەمدەرامەتەکان و دوورخستنەوەی پارێزگاری شارەکانی بەغدا و کەربەلا.

لە دوای ئەو خۆپیشاندانانەی كە لە رۆژی سێشەممەی رابردووە لە شاری بەغدا و چەند شارێكی باشووری عێراق دژبە گەندەڵی، بێكاری و خراپی خزمەتگوزارییەكان ئەنجام دەدرێن، ئەمە یەكەمجارە گەورە بەرپرسێك لەگەڵ نوێنەرانی خۆپیشاندەران كۆببێتەوە.

هاوکات، کۆمسیۆنی باڵای مافەکانی مرۆڤی عێراق بڵاویانکردووەتەوە، سەرەڕای هەڵگرتنی قەدەغەی هاتوچۆ و هەوڵی هێزە ئەمنییەکان بۆ هێورکردنەوەی دۆخی شارەکان، خۆپیشاندان لە بەغدا و شارەکانی دیکە بەردەوامە و بە هۆیەوە ژمارەی قوربانییەکان بۆ ١٠٠ کوژرا و زیاتر لە چوار هەزار بریندرا بەرزبووەتەوە.

ماوەی چەند رۆژی رابردوودا، خۆپیشاندان و ناڕەزایەتیی دژ بە گەندەڵی، بێكاری و خراپی خزمەتگوزارییەكان شاری بەغدا و چەند شارێكی باشوری عێراقی گرتەوە و تاوەکو ئێستە بەردەوامە، لە خۆپیشاندانەکاندا ئاڵۆزی لە نێوان خۆپیشاندەران و هێزە ئەمنییەكاندا روویدا و بە هۆیەوە تا ئێستا ١٠٠ كەس كوژراون.