ئەمڕۆ، بۆ جاری دووەم دادگاییكردنی بكوژانی تاریقی بەقاڵ لە دادگای سلێمانی بەڕێوەچوو، و لە دانیشتنی داداگادا بکوژەکان سزای لە سێدارەدانیان بەسەردا سەپێنرا.

پەیامنێری KNN لە سلێمانی ڕایگەیاند: دادگای سلێمانی سزای لە سێدارەدانی بەسەر هەرسێ تۆمەتباری دۆسیەی كوشتنی تاریقی بەقاڵ سەپاند.

ئەمەش لە کاتێکدایە ڕۆژی 27 ی مانگی ڕابردوو, یەكەم دانیشتنی دادگا بۆ دادگاییكردنی بكوژانی تاریقی بەقاڵ دەستیپێكرد و دایك و خاڵی تاریقی بەقاڵ وتەیان لێ وەرگیرا, بەڵام بەهۆی ئاڵۆزییەوە دانیشتنەكە بۆ ئەمڕۆ دواخرا.

رۆژی ٧ی نیسانی ٢٠١٩، ئاسایشی سلێمانی، دەسگیركردنی گروپێكی مەترسیداری كوشتن‌ و دزیكردنیان ئاشكرا كرد كە چەندین تاوانیان ئەنجامداوە لە دزین ‌و فڕاندن‌ و كوشتنی هاوڵاتییان و چیرۆکی کوشتنی کەسێک بە ناوی تاریقی بەقاڵ لەلایەن ئەو گروپەوە زۆرترین کاردانەوەی لێکەوتەوە.