بەرپرسێكی پێشمەرگە ڕایدەگەیەنێت، پێشمەرگە و سوپای عێراق لە سنوری میحوەری رۆژئاوای دیجلە، لەسەر چەند خاڵێكی ئەمنی و مرۆیی رێككەوتن.
لیوا هاشم سیتەیی، جێگری بەرپرسی میحوەری ڕۆژئاوای دیجلەی هێزەكانی پێشمەرگە، راگەیاند: رێككەوتنی پێشمەرگە، لە رۆژئاوای دیجلە، لەگەڵ فیرقەی ١٥ی سوپای عێراقە، بۆ دابینكردنی ئاسایش و نەهێشتنی بۆشایی ئەمنی و پاراستنی خەڵكی رۆژئاوای دیجلەیە بە سەرجەم پێكهاتەكانییەوە، هەروەها هەماهەنگی كراوە بە هاوبەشی روبەڕوی جموجۆڵەكانی تیرۆریستانی داعش ببنەوە.
راشیگەیاند: لە چوارچێوەی رێككەوتنەكە، رێگاكانی نێوان قەزای زوممار و ناحیەی رەبیعە لەگەڵ رێگاكانی سحێلا و دهۆك كراوەتەوە و هاوڵاتیانی سنورەكە بەبێ بونی هیچ كێشەیەك دەتوانن هاتوچۆ و كار و بارزگانی بكەن.
وتیشی، دوو لیژنەیان پێكهێناوە لە مانگێكدا دوو كۆبوونەوە یان زیاتر ئەنجامدەدەن، بۆ نەهێشتنی بۆشایی ئەمنی و پاراستنی ئاسایشی خەڵك، زانیاری كۆبوونەوەكانیان و دوایین پێشهاتەكانی ناوچەكە بە سەروی خۆیان دەگەیەنن.
362 جار خوێندراوەتەوە