ئاسایشی کۆمەڵایەتی، وەك ئەرکی هەمووان

زۆربوونی تاوان و گێرەشێوێنی لە کۆمەڵگەدا نیشانەی نەمانی ئاسایشە، دابین کردنی ئاسایشی تاك و کۆمەڵگە ئەرکی سەرشانی دەزگاکانی دەوڵەتە، وبەرپرسیارێتی ئەو کەسانەیە کە دەسەڵات بەڕێوەدەبەن و میللەت دەنگی پێداون.

 

پاراستنی ئاسایشی تاك و کۆمەڵگە بە یەکسانی و چەسپاندنی یاسا دەبێت، لەهەمان کاتیشدا دابینکردن و پاراستنی ئاسایش ئەرکی تاکەکان و کۆمەڵگەش خۆیەتی، دەبێ تاکەکان ئەو هەستەیان تێدابێت کە بە تاوان کردن ئاسایشی کۆمەڵگەکەی خۆیان تێكدەدەن، و لەو یاسایانە دەردەچن کە بۆ خزمەتکردنی ئەوان داڕێژراون و دەرچوێندراون لەباڵاترین دەسەڵاتی یاسادانان کە (پەرلەمان) ە.

 

کەواتە پاراستنی ئاسایشی تاك و کۆمەڵگە ئەرکێکی دولایەنەی نێوان تاك و دەسەڵاتە کە هەریەکەیان دەبێ ئاسایشی ئەوی تریان بپارێزێت، هەروەها نابێت ڕاگەیاندن و تۆڕەکۆمەڵایەتییەکان بنەما ئەتەکێتیەکانی بوارەکەیان ببەزێنن، ئەگەر بنەما ئەتەکێتیەکانی ڕاگەیاندن بەزێندرا بەمەش كاردەكاتە سەر ئاسایشی كۆمەڵایەتی و ووروژان و نائارامی دروست دەكات بەتایبەتی لەكاتی قەیرانە سیاسی و ئابورییەكاندا.

 

بێگومان پەیوەندی هەیە لە نێوان ڕاگەیاندن (تۆڕە کۆمەڵایەتییەکان) و ئاسایشی كۆمەڵایەتیدا، ڕاگەیاندن (تۆڕە کۆمەڵایەتییەکان) سیفەتی ئاڕاستەكردنی كۆمەڵگەی هەیە، بەتایبەتی لە ئێستادا كە میدیا خۆی لە گشت جۆرەكانی بیستراو بینراو نوسراو تۆڕەكۆمەڵایەتیەكاندا دەبینێتەوە، تاكی كۆمەڵگە بەر یەكێك لەم جۆرانەی ڕاگەیاندن دەكەوێت، ڕاگەیاندنیش لەپێناو گەیاندنی پەیام بۆ وەرگرانی پەیام زۆر جار میدیا لە پێناو بەرنامە سیاسی و ئابورییەكەی خۆی ئەم كارە دەكات، ئەوەی زەرەری بەردەكەوێت كۆمەڵگەیە.

 

گەر سەیری میدیای كوردی بكەین بەگشت جۆرەكانیەوە زۆربەیان لە كاتی دیاریكراودا بۆ مەرامەكانیان ئامادەن ئاسایشی كۆمەڵایەتی بشێوێنن، زۆر جار ڕاگەیاندنی كوردی ژەهری ئاڕاستەی كۆمەڵگە كردووە، بۆ نمونە لە بڵاوكردنەوەی هەواڵی بێ سەرچاوە، یان سەرچاوەیەك كەناوی ئاشكرا نەكرد! یان دراماو گۆرانییەكان كە لە قسەكاندا چەندین سوكایەتی تێدایە بە توێژەكانی كۆمەڵگە، تاك فێری جنێوی سیاسی و كۆمەڵایەتی دەكەن.

 

هۆنراوەی گۆرانیە كوردیەكان پڕە لە سوكایەتی بە توێژی ژنان، میدیای كوردی لە قەیرانێکی جدیدایە، و تا ئێستاش لەلای ئەو بەرژەوەندی ئابوری و سیاسی و حزبی و تایبەتی لە پێش ئاسایشی كۆمەڵایەتیەوەیە، ڕاگەیاندنی کوردی فلتەری کلتوری، كۆمەڵایەتی و دەروونی نییە لە پێشکەشکردنی پڕۆگرامەكانیدا، ئەتەكیەت کەهونەرێکی جوانی ژیانە لەکەناڵەڕاگەیاندنەکاندا زۆربەی جار ئامادەگی نییە (غیابە) تائاستی غیابی و لاوازی لێپرسینەوەی لایەنی پەیوەندیدار.

 

بەداخەوە کارەساتەکە ئەوەیە کەزۆرینەی تاكی كورد پەیوەست (هۆگر) بوونە بەم میدیا و ڕاگەیاندنە كوردیانەوە، بۆیە هاوڵاتی بەئاسانی لەلایەن ئەم میدیایانەوە (بینراو، بیستراو، نوسراو و تۆڕەکۆمەڵایەتییەکان) ئاڕاستە دەكرێن و بەکاردەهێنرێن، ڕاستە لێرەو لەوێ میدیا و راگەیاندنکار و ڕۆژنامەوان و نوسەری بەرپرس هەیە، بەڵام بەداخەوە کەمینەیەکی وونن لەناو ئەم فەوزاو بێ سەرەوبەرەییەی ئەمڕۆدا، دەبینین و هەنوکە بڵاوكردنەوەی هەواڵ لەسەر قوڵكردنەوەی قەیران وکێشە کۆمەڵایەتی، ئابوری و سیاسیەكانە.

132 جار خوێندراوەتەوە