بارەگای ناوەندیی خاتەمولئەنبیا هۆشداریی توند دەداتە ئەمریکا و رایدەگەیەنێت، هەر جۆرە دەستوەردانێکی واشنتن لە گەرووی هورمز، رووبەڕووی کاردانەوەی خێرا و یەکلاکەرەوەی هێزە چەکدارەکانی ئێران دەبێتەوە، هاوکات داوا لە سەرجەم کەشتییە بازرگانییەکانیش دەکات بۆ هاتووچۆکردن پابەندی ئەو رێڕەوانە بن کە تاران دیاری کردووە.

لە راگەیەندراوێکدا بارەگاکە ئاماژەی بەوە کردووە: "گەرووی هورمز گۆڕەپانی یارییکردنی ئەمریکای دەستدرێژکار نییە، بەڵکو پانتایی سەروەریی حاشاهەڵنەگری کۆماری ئیسلامیی ئێرانە." هەروەها جەختی لەوە کردووەتەوە کە پاراستنی ئاسایش و سەقامگیریی ئەو رێڕەوە ئاوییە ژیارییە، هێڵی سووری هێزە چەکدارەکانی ئێرانە.

لە بەشێکی دیکەی راگەیەندراوەکەدا، بارەگای ناوەندیی خاتەمولئەنبیا مەرجی نوێ بۆ جووڵەی دەریایی لە ناوچەکەدا دیاری دەکات و دەڵێت: "پێویستە سەرجەم کەشتییە نەوتهەڵگر و بازرگانییەکان، لە پێناو دابینکردنی ئاسایشی هاتووچۆکانیان لە گەرووی هورمز، لەو رێڕەوەوە جووڵە بکەن کە ئێران دیاری کردووە."