پشتیوان پێنجوێنی، شارەزای کەشناسی سەبارەت بە پێشبینییەکانی کەشوهەوا ڕایگەیاند، لە هەفتەی داهاتوودا پلەکانی گەرما پێنج بۆ حەوت پلە نزم دەبنەوە و دواتریش شەپۆلێکی گەرما ڕوو لە ناوچەکانی هەرێمی کوردستان دەکات.

پێنجوێنی ئاماژەی بەوە کردووە، لە مەودای نێوان (14 بۆ 16)ی ئەم مانگەدا، بارستە هەوایەکی نیمچە فێنک و ساردی لاواز ڕوو لە ناوچەکانی هەرێمی کوردستان دەکات. بەهۆیەوە پلەکانی گەرما بەراورد بە ڕۆژانی ڕابردوو بەڕێژەی پێنج بۆ حەوت پلە نزم دەبنەوە، هاوکات خێرایی با چالاک دەبێت و ئەگەری دروستبوونی خۆڵبارینیش هەیە.

سەبارەت بە کەشوهەوای ڕۆژانی دواتر، ئەوەشی خستووەتەڕوو کە لە مەودای (17 بۆ 22)ی مانگ، شەپۆلێکی گەرما ڕوو لە ناوچەکان دەکات و جێگیر دەبێت.

هاوکات ڕوونیشیکردووەتەوە کە ئەو شەپۆلی گەرمایە کاتی دەبێت و دواتر بۆ ماوەیەک جارێکی دیکە بارستە هەوای نیمچە فێنک دەگەڕێتەوە.