شارەزایەکی کەشناسی هۆشداری دەدات لە هاتنی شەپۆلێکی بەهێزی بارانبارین و تەرزە، کە لە سبەینێ یەکشەممەوە سەرجەم ناوچەکانی هەرێمی کوردستان دەگرێتەوە و ئەگەری دروستبوونی لافاو و بەرزبوونەوەی ئاستی ئاو لە چەند ناوچەیەک هەیە.

ئاراس جەبار، شارەزای کەشناسی بڵاویکردووەتەوە؛ بەهۆی یەکگرتنی بارستەهەوایەکی شێداری گەرم و بارستەهەوایەکی ساردی چینەکانی سەرەوەی بەرگەهەوا، ناجێگیریی کەشوهەوا ناوچەکە دەگرێتەوە. ئەمڕۆ شەممە شەپۆلەکە بە دروستبوونی هەوری 'سوپەرسێڵ' و بارینی تەرزەی قەبارە گەورە لە ڕۆژئاوا، ناوەڕاست و باشووری عێراق دەست پێدەکات.

ئاماژەی بەوەشکردووە، سبەینێ یەکشەممە (26ی نیسانی 2026) کاریگەرییەکانی ئەم شەپۆلە دەگاتە هەرێمی کوردستان. لە دوانیوەڕۆوە بە شێوەی پچڕپچڕ شەستەباران، هەورەبروسکە و با دەستپێدەکات و لە کاتەکانی شەودا کاریگەرییەکەی بەهێزتر دەبێت و تەواوی ناوچەکانی (گەرمیان، سلێمانی، هەڵەبجە، کەرکوک، هەولێر، دهۆک، ڕاپەڕین، سۆران و زاخۆ) دەگرێتەوە. هاوکات پێشبینی دەکرێت پلەکانی گەرما (3 بۆ 5) پلە داببەزن.

سەبارەت بە ڕۆژانی دواتر، ئەو شارەزایەی کەشناسی پێشبینی دەکات ڕۆژی دووشەممەش تاوەباران و تەرزەی بەخوڕ بەردەوام بێت، هەرچەندە لە کاتەکانی ئێوارەدا کەشوهەوا تا ڕادەیەک جێگیر دەبێتەوە، بەڵام کاریگەریی لاوازی شەپۆلەکە تاوەکو ڕۆژی پێنجشەممە بەتایبەت لە ناوچە شاخاوییەکان بەردەوام دەبێت.