مەزڵوم عەبدی دەڵێت لە ڕەققە و دێرەزوور کشانەوە چونکە شەڕەکە شەڕێکی بێمانابوو بۆ کورد، ئێستا بابەتەکە ڕۆژئاوای کوردستانە و نیشتیمان هێڵی سورە، هەرچەندە کورد شەڕی ناوێت و دەیەوێت لەڕێگەی دانوستانەوە مافەکانی دەستەبەربێت، بەڵام تا کۆتایی بەرگریی لە خاک دەکەن.

هەواڵ:KNNC

مەزڵوم عەبدی فەرماندەی گشتیی هێزەکانی سوریای دیموکرات-هەسەدە لەبارەی ڕەوشی ڕۆژئاوای کوردستان و سوریا قسەیکرد و ڕایگەیاند: کشانەوە لە ناوچە عەرەبییەکان جیاوازبوو لە ئێستا کاتێک بابەت نیشتیمان بێت سازش لە هیچ شتێک ناکرێت.

فەرمانداری هەسەدە وتی، کورد لە ڕابردوودا بە مەبەستی پاراستنی ناوچەکە چووەتە ڕەققە و دێرەزوور و لەدوای ئەوەی شۆڤێنییەت و دەمارگیریی لەوێ سەری هەڵدا شەڕڤانان کشانەوە چوکە شەڕەکە شەڕێکی بێمانابوو بۆ کورد، ئێستا ئێمە لە ڕۆژئاوای کوردستانین و لەسەر خاک و ئاوی خۆمانین نیشتیمان هێڵی سورە و تا دوا کەس ئێمە بەرگریی لێدەکەین.

ژەنەراڵ مەزڵوم وتیشی، دانوستانەکان بەردەوامن بە هەوڵ و نێوەندگیریی ئەمەریکا و فەڕەنسا و لایەنەکانی دیکە و ئێمە هەوڵ دەدەین ڕێککەوین مافی کورد وەک خۆی دەستەبەربکرێت، لە چوارچێوەی دواڕێککەوتندا، ڕێککەوتنەکە کراوە جێبەجێکردنیشی لەسەر هەندێک بابەت ماوە کە دانوستانیان لەسەر دەکرێت، هیواشی خواست هەمووان پابەندی بەڵێنەکانیان بن و هەموو شت وەک خۆی جێبەجێ بکرێت، چونکە کورد بە هەمان بەرخۆدان و تێکۆشانی کۆبانێ بەردەوامە لە بەرگریی.

ئاماژەی بەوەشدا، بابەتی گەڕانەوەی ئاوەراکنی عەفرین و گرێسپی و سەرێکانی بەشێکن لە دانوستانەکان و جیاوازیی لەنێوان هیچ ناوچەیەکی کوردیدا نییە و دەبێت ڕێککەوتنەکان بۆ هەموو ناوچەکان بن.

لەبارەی برایەتی گەلانیشەوە وتی، ئێمەی کورد گەلێکی خاوەن پەروەردە و ئاکارین و بە درێژایی مێژوومان لەسەر بەهای جوانمانەوە تا ئێستا بەردەوامین، ئێمە ناتوانین نەتەوەپەرستبین، بەڵام دەبێت بە ئاگایی یەوە تێکەڵبین لەگەڵ ئەوانی دیکە و نزیکبوونەوەمان بەشێوەیەکی دروستبێت، ناتوانین بڵێین هەموو عەرەب خراپە چونکە ئێمە چەندین سەرکردەی عەرەب لە ڕیزەکانماندایە و هەزاران شەهیدی عەرەبمان هەیە و ئەوانیش ڕێزی ئێمە دەگرن.

لەبارەی هاوپشتییەکانی کوردان بۆ ڕۆژئاوا فەرماندارە کوردەکە ئاماژەی بەوەدا، ئەوەی دەبینرێت جێگەی خۆشحاڵییە و ڕۆژئاوا نرخنادێکی مەزنی بۆ ئەو پاڵپشتییانە هەیە بێگومان جێگەی خۆیان دەگرن، بۆیە پێویستە گەل بەردەوام بێت لە هەموو جۆرە خەباتیک تا کورد دەگاتە ئامانج و مافەڕەواکانی خۆی...