تۆم براک، نێردەی تایبەتی ئەمریکا بۆ سوریا، لە پەیامێکی نوێدا کە ئەمڕۆ هەینی لە هەژماری فەرمی خۆی لە تۆڕی کۆمەڵایەتی "ئێکس" بڵاویکردەوە، ئاشکرای کرد کە وڵاتەکەی "بە شەو و ڕۆژ" کار دەکات بۆ هێورکردنەوەی ئەو بارگرژییەی لە نێوان هێزەکانی سوریای دیموکرات (هەسەدە) و حکومەتی سوریادا هاتوەتە ئاراوە.

نێردە ئەمریکییەکە جەختی لەوە کردەوە کە واشنتن لە پەیوەندییەکی "نزیک و چڕدایە" لەگەڵ سەرجەم لایەنە پەیوەندیدارەکان. ئەم جوڵە دیپلۆماسییە تەنها بۆ ڕێگریکردن نییە لە پەرەسەندنی سەربازی، بەڵکو ئامانجێکی ستراتیژیی تری لەپشتە، ئەویش گەڕانەوەی هەردوولا بۆ سەر مێزی گفتوگۆ و زیندووکردنەوەی پرۆسەی دانوستانەکانە.

چاودێران پێیان وایە ئەم لێدوانانەی براک ئاماژەیەکی ڕوونن بۆ ئەوەی ئەمریکا نایەوێت هاوسەنگیی هێز لە باکوور و ڕۆژهەڵاتی سوریا تێکبچێت و هەوڵ دەدات لە ڕێگەی فشار و نێوەندگیرییەوە، ڕێگری لە هەر کاردانەوەیەکی سەربازی بکات کە دۆخەکە بەرەو ئاقارێکی نادیار بەرێت.