مەزڵوم عەبدی و شاندێکی یاوەری سەردانی دیمەشقیان کرد و پرسی تێکەڵکردنی هێزەکانیان لەگەڵ دیمەشق تاوتوێکرد و ئاماژەکان دەری دەخەن ئەمڕۆش کورد و دیمەشق نەگەیشتونەتە ڕێککەوتن.

هەواڵ:KNNC

ئەمڕۆ شاندێکی ڕۆژئاوای کوردستان کە پێکهاتبوون لە سێ فەرماندەی سەربازیی هێزەکانی سوریای دیموکرات-هەسەدە کە پێکهاتبوون لە، مەزڵوم عەبدی فەرماندەی گشتیی و سۆزدار دێرک ئەندامی سەرکردایەتی گشتی هەسەدە و تاکە ژنی نێو کۆبوونەوەکە و سیپان حەمۆ ئەندامی گشتیی فەرماندەیی هەسەدە، سەردانی دیمەشقیان کرد بۆ کۆبوونەوە لەگەڵ بەرپرسانی دەسەڵاتی ڕاگوزەری سوریا و تاوتوێکردنی پرسەکانی نێوانیان و جێبەجێکردنی بەندەکانی ڕێککەوتنی ئازار.

لە کۆبوونەوەی نێوان هەسەدە و بەرپرسانی حکومەتی کاتی سوریادا، ژەنەراڵێکی ئەمەریەکی بەناوی کێڤن لامبێرد ئامادەبوو.

دوای کۆبوونەوەکەش هەسەدە ڕایگەیاند: لەگەڵ بەرپرسانی دیمەشق تەوەری سەرەکییان پرسی تێکەڵکردنی هێزە سەربازییەکان بووە و وردەکاریی زیاتریش لە دواتردا بڵاودەکەنەوە.

سەرچاوەیەکیش لە حکومەتی دیمەشق بە تەلەفزیۆنی سوریای ڕاگەیاند: کە لە کۆبوونەوەی ئەمڕۆیاندا لەگەڵ هەسەدە نەگەیشتونەتە ڕێککەوتن و کۆبوونەوەی دیکە ئەنجامدەدەن.