هادی عامری دەڵێت بە هیچ شێوەیەک هەڵوەشاندنەوەی حەشدی شەعبی قبوڵ ناکەن و بەپێچەوانەوە دەبێت کۆتایی بە ئەرکی هاوپەیمانان بێت لە عێراق و هەرچی زووە وڵاتەکە بەجێ بهێڵن.

هەواڵ:KNNC

هادى عامرى سه‌رۆكى هاوپه‌یمانى فه‌تح و سەرۆکی ڕێکخراوی بەدر لەبارەی چەکدانانی گروپەچەکدارەکانی عێراق ڕایگەیاند: هەموو ئەوانەی لەبارەی حەشدی شەعبییەوە باس دەکرێن تەنها دەنگۆن و ئەگەریش بابەتەکە ببێتە ڕاست بە هیچ جۆرێک چەکدانان ڕوونادات و هەڵوەشاندنەوەی ئەو گروپە ناکەن، چونکە دامەزراوەیەکی فەرمییە.


هادی عامری وتی"هه‌ركه‌س بڵێت ده‌بێت حه‌شدى شه‌عبى هه‌ڵبوه‌شێته‌وه‌، ئێمه‌ پێى ده‌ڵێین ڕێزى خۆت بگره ‌و هه‌رگیز شتێكى وا قبوڵناكه‌ین، به‌ڵام ئه‌گه‌ر بڕیارێكیش هه‌بێت بۆ چه‌كدانان، ئێمه‌ ڕه‌تیده‌كه‌ینه‌وه‌ ئه‌گه‌ر ئه‌و بڕیاره‌ دەرەکیی بێت، چونكه‌ ده‌بێت ئه‌وه‌ بڕیارى حكومه‌ت ‌و گه‌لى عێراق بێت".

هادی عامری ئاماژەی بەوەشکرد، مه‌رجه‌عى باڵاى ئایینى په‌یامى پێداون لەبارەی چەکدانان و وتویانە، ده‌بێت چه‌ک ته‌نها له‌ده‌ستى ده‌وڵه‌تدابێت ‌و ئەوانیش وەک هاپەیمانییەتی فەتح لەگەڵ ئەوەدان کە چەک تەنها لە دەستی دەوڵەتدابێت ئەوەش مەرجدارە و بەستراوەتەوە بە بوونی هاوپەیمانان لە عیراق.



لەو بارەیەوە سەرکردەکەی شیعە پەیامی توندی دایە هاوپەیمانان و وتی، "سه‌ره‌تا ده‌بێت ئه‌وان كۆتایی به‌ئه‌ركیان بهێنن له‌عێراق، هه‌رچه‌ند خۆیشیان پێشتر وتیان له‌مانگى ئه‌یلولى ئه‌مساڵ كۆتایی به‌ئه‌ركه‌كه‌یان ده‌هێنن، به‌ڵام وا ساڵ کۆتایی دێت هێشتا لێرەن، هەرکات ئەوان پابەندی بڕیار و بەڵێنی خۆیان بوون ئینجا ئەرکی گروپەچەکدارەکان دەستپێدەکات و لەگەڵ دەوڵيتی خۆمان دەبین کە عێراقە نەک وڵاتانی دەرەوە و فشارەکانیان."