سه‌رۆكی ئه‌نجومه‌نی باڵای عه‌له‌وییه‌كان ده‌ڵێت فیدراڵییه‌ت و نامه‌ركه‌زییه‌ت له‌سوریا ته‌نیا رێگه‌یه‌ بۆ ده‌ربازبون له‌سته‌مكاری.

هەواڵ:KNNC

شێخ غه‌زال غه‌زالی له‌تاراوگه‌وه‌ راگه‌یه‌نراوێكی بڵاوكرده‌وه‌و تیایدا دوپاتیكردوه‌ته‌وه‌؛ حكومه‌تی راگوزه‌ری سوریا شكستی هێناوه‌ له‌جێبه‌جێكردنی ساده‌ترین ئه‌ركیدا، هه‌ربۆیه‌ ته‌نیا ڕیگه‌ بۆ یه‌كێتیی و گه‌شه‌كردن و ئاشتی له‌سوریا نه‌ك دابه‌شبوون و جه‌نگ سیستمی فیدراڵیی و نامه‌ركه‌زییه‌ت و مافی چاره‌ی خۆنووسینه‌ به‌پێی یاساو ده‌ستوور.

به‌پێی هه‌مان راگه‌یه‌نراو پشتیوانی خۆی بۆ عه‌له‌وییه‌كانی سوریا دوپاتكردوه‌ته‌وه‌ له‌سوربوونیان له‌سه‌ر هه‌ڵوێستی نه‌گۆڕیان سه‌رباری ئه‌و ئاسته‌نگ و ئاڵنگاریانه‌ی كه‌ هاتونه‌ته‌ به‌رده‌میان .

شێخ غەزال غه‌زالی راشیگه‌یاندوه‌؛ كه‌ پێویسته‌ خه‌ڵكی به‌پێی یاساو ده‌سته‌به‌ركردنی مافی ته‌واوو سیستمی فیدراڵیی  به‌ڕێوه‌ببرێت نه‌ك پشت به‌ستن به‌گوشارو زۆره‌ملێیی و گوێرایه‌ڵیی كوێرانه‌.