بڕیار وایە ئەمڕۆ چوارشەممە، بەبێ باسکردنی موچە ئەنجومەنی وەزیرانی هەرێم کۆببێتەوە و داهاتە نانەوتییەکان و دۆسیەی دەستپێکردنەوە هەناردەکردنەوەی نەوت لە تەوەرە سەرەکییەکانی کۆبونەوەکەن

هەواڵ:KNNC

بە گوێرەی راگەیەندراوی حکومەتی هەرێم، ئەمڕۆ چوارشەممە ئەنجومەنی وەزیرانی هەرێمی کوردستان کۆ دەبێتەوە و نوێترین پێشهات و هەردو دۆسیەی داهاتە نانەوتییەکان و دەستپێکردنەوەی هەناردەی نەوتی هەرێم و خستنەڕوی بڕیارەکانی کۆبونەوەی دوێنێی ئەنجومەنی وەزیرانی عێراقی فیدڕاڵ گفتوگۆیان لەسەر دەکرێت.

وەک لە راگەیندراوەکەدا هاتوە؛  كۆنوسی هاوبەشی وەزارەت و لایەنە پەیوەندیدارەكان تایبەت بە پێشنیاریان سەبارەت بە پیادەكردنی یاسای ڕاژە و خانەنشینیی پێشمەرگە، ژمارە (38)ی ساڵی 2007  دەخرێتە ڕو.

جیا لەو بابەتانەش، ڕاسپاردەكانی وەزارەتی دارایی و ئابوری، سەبارەت بە ئاسانكاریی پێشینە و قەرزەكانی تایبەت بە (خانوبەرە، كشتوكاڵ، پیشەسازی، نیشتەجێكردن و گەشتیاری) بابەتێکی دیکەی کۆبونەوە دەبێت.

بەشێکی دیکەش لە کۆبونەوەکە  پرۆسەی یەكخستنەوەی ڕێكارە داراییەكانی نێوان حكومەتی هەرێم و حكومەتی فیدراڵی دەبێت، هەروەها چەند پێشنیار و ڕاسپاردەیەكی وەزارەتی دارایی بۆ یەكخستنی ڕێكار و ڕێنماییەكانی باج و ڕێژەكانیان، لەنێوان دامەزراوەكانی باج لە هەردوو حكومەتی هەرێم و فیدراڵ دەخرێتە ڕو.