دوای زیاتر لە 50 رۆژ دەستبەسەربون، فەرمانگەی پەیوەندییەكانی دەرەوەی حكومەتی هەرێمی كوردستان، بڵاویکردوەتەوە،  ئەو 25 گەنجە کوردەی لە لیبیا ئازادکران لە رێگەی فڕۆکەخانەی نێودەوڵەتیی هەولێرەوە گەیشتنەوە هەرێمی کوردستان.

هەواڵ:KNNC

ئەمڕۆ چوارشەممە، فەرمانگەی پەیوەندییەكانی دەرەوەی هەرێم گەشتنەوەی 25 گەنجە کوردەکەی لیبیای ڕاگەیاند و ڕاگەیەندراوێکیان بڵاوکردوەتەوە و تێیدا هاتوە؛  لە فڕۆکەخانەی هەولێر پێشوازیان لە گەنجەکان کردوە و پێداویستی پزیشکیشیان بۆ دابینکراوە.

ئاماژەیان بەوە کردوە، ئەو گەنجانەی دەستبەسەربون لە لیبیا، سەرجەمیان بە خاکی وڵاتەکەیان شادبونەتەوە و لە ئێستادا سەلامەتن، ئەمەش دوای زیاتر لە 50 رۆژ دەستبەسەربون لە لیبیا کە بەهەۆیەوە توشی ئازار و مەینەتی زۆر ببونەوە.

لە ڕاگەیەندراوەکەیاندا، سوپاسی هەوڵەکانی بەرپرسی فەرمانگەی پەیوەندییەکانی دەرەوە و هەڵسوڕێنەری کاروباری باڵیۆزخانەی عیراقییان لە لیبیا کردوە، کە توانیان گەنجەکان بدۆزنەوە  و دوای ئازادکردنیشیان  پاسپۆرتیان بۆ دابین بکەن.

جێی باسە ئەو گەنجانە لە هەوڵدابون لە ڕیگەی ئاویەوە  ولە وڵاتی لیبیاوە بگەنە ئەوروپا، بەڵام لەوێ دەستگیرکراون و بۆ ماوەی زیاتر لە 50 رۆژ دەستبەسەربون.