عەلی موسەوی، پەرلەمانتاری دەوڵەتی یاسا لە پەرلەمانی عێراق دەڵێت:   تا(200) ساڵی تر پۆستی سەرۆك وەزیران لای شیعە دەمێنێتەوە، دەشڵێت بە هەمو توانای خۆمان هەوڵی گەڕانەوە مالیكی دەدەین بۆ سەرۆك وەزیران

هەواڵ: KNN

عەلی موسەوی، پەرلەمانتاری عێراق لە  دەوڵەتی یاسا لە چاوپێكەوتنێكدا لەگەڵ كەناڵی "سۆمەریە نیوز"ئاماژەی بەوەکرد، سەرۆکی هاوپەیمانی دەوڵەتی یاسا، نووری مالیکی، هەرگیز باسی هەڵوەشاندنەوەی هەڵبژاردنەکانی داهاتووی نەکردوە، بەڵکو جەختی لەسەر پێویستی ئەنجامدانی هەڵبژاردنەکانی کردووەتەوە.

موسەوی ڕونیشیکردەوە، کە"دەسەڵاتی ئایینی ڕاسپاردەی کردوە کە هەموو شیعەکان بەشداری هەڵبژاردنەکانی داهاتو بکەن، ئەمەش دەبێتە هۆی بەشداریکردنی بەرفراوانی عێراقیەکان لە هەڵبژاردنەکەدا.



وتیشی: "پێگەی سەرۆک وەزیران بۆ ماوەی 200 ساڵی داهاتوو لە دەستی پێکهاتەی شیعەدا دەمێنێتەوە و وەرگرتنی لێیان لە خەونێکی مەحاڵ زیاتر نییە، وەک خەونی شەیتان وایە بۆ بەهەشت".

باسی لەوەشکردوە: ئەوەی ئێستا لە عێراق و ناوچەکە روودەدات، بەشێکە لە پرۆژەی ئیسرائیلی گەورە.

موسەوی ئاماژەی بەوەشكرد: بە هەموو توانامانەوە هەوڵ دەدەین بۆ گەڕانەوەی نوری مالیکی بۆ پۆستی سەرۆک وەزیران، بەو پێیەی هێشتا خەڵک پێی دەڵێن "باوكى نان" بەهۆی ئەوەی لە ماوەی ساڵانی دەسەڵاتيدا خێرو بێیری  پێشكەش كردوە.